Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 252 Hüküm no: 280 Orijinal metin no: [57b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Beşe b. İsa’nın mülk bağ yerini Totoş? v. Şemu?’ya sattığı Vilâyet-i Rumeli’nde Yenişehir kazâsına tâbi‘ Fenar nâhiyesi ihtivâsından Küçük Kermun? nâm karye sâkinlerinden Hasan Beşe b. İsâ nâm kimesne meclis-i şerî’at-i şerîfede işbu bâ‘isü’s-sifr Todoş v. Şemu? nâm zimmî muvâcehesinde bi tav‘ihî ikrâr ve i‘tirâf edip karye-i mezbûrede vâki‘ bir tarafdan Todori v. Yani bağı ve bir tarafdan Armağan v. Ergiri bağı ve bir tarafdan Apostol v. Petro nâm zimmî bağı ve bir tarafdan Panayot v. Yani bağı ile mahdûd olup tahmînen bir dönüm bir kıt‘a mülk bağ yerimi mezbûr Totoş zimmîye tarafeynden îcâb ve kabûlü hâvî bey‘-i bâtt-ı sahîh-i şer‘î ile üç yüz cedîd akçeye bey‘ edip ol dahi vech-i mübeyyen üzre iştirâ ve kabûl eyleyip semeni olan meblağ-ı mezbûr üç yüz akçeyi yedinden tamâmen ahz ü kabz eylediğimden sonra zikr olunan bağ yerimi mahallinde zabt ve tasarrufa mezbûr Totoş’u taslît eyledim dedikde gıbbe’t-tasdîki’ş-şer‘î mâ hüve’l-vâki‘ bi’l-ibtigā ketb olundu. Fi’l-yevmi’t-tâsi‘ ve’l-ışrîn mine’l-Muharremi’l-harâm sene [10]66. Şuhûdü’l-hâl: Ali Beşe b. Mustafa, Hüseyin Beşe b. Ali, Mustafa Beşe b. Mehmed, Ahmed Beşe b. Hasan, Ahmed Beşe b. Hüseyin, Mehmed b. Ali