Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 252 Hüküm no: 281 Orijinal metin no: [57b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Bey b. Hüseyin’in mülk bağını Sofyanoz v. Lanbo’ya sattığı Vilâyet-i Rumeli’nde Yenişehir kazâsına tâbi‘ Kuhistân nâhiyesi ihtivâsından Özgolop nâm karyeden olup bundan akdem karye-i mezbûre subaşısı olan fahrü’l-eşbâh Hasan Bey b. Hüseyin nâm kimesne meclis-i şerî’at-i şerîfede işbu râfi‘ü’s-sifr Sofyanoz v. Lanbo nâm zimmî muvâcehesinde bi tav‘ihî ikrâr eder ki karye-i mezbûrede vâki‘ bir tarafı Yani v. Lori bağı ve bir tarafı Apostol v. Kasar bağı ve bir tarafı Dimo v. Komno bağı ve bir tarafı tarîk-i âm ile mahdûd ve mümtâz olup tahmînen iki dönüm bir kıt‘a mülk bağımı mezbûr Sofyanoz’a bey‘-i kat‘î ile iki bin fıddî nakd-i râyic fi’l-vakt akçeye bey‘ edip ol dahi minvâl-i mübeyyen üzre iştirâ ve kabûl eyleyip semen-i mezbûr iki bin akçeyi mersûm Sofyanoz yedinden tamâmen alıp kabz eylediğimden sonra zikr olunan bağı mahallinde zabt ve tasarrufa mezbûr Sofyanoz’u taslît eyledim dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Hurrire fi’t-tâsi‘ ve’l-ışrîn mine’l-Muharremi’l-harâm li sene sittîn ve sittîn ve elf. Şuhûdü’l-hâl: Ömer Bey b. Ali, Receb Efendi b. Abdi, Hüseyin b. Ali, Dilâver b. Abdullah, Yani v. Dimo, Roso v. Yorgi, Zahari v. İskarlet?, Diyako? v. Koli?