Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 253 Hüküm no: 283 Orijinal metin no: [57b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vefat eden Davud Çelebi b. Hacı Sefer’in vârislerinin menzil hisselerini Davud Çelebi’nin zevcesi Vildan Hâtun’a sattıkları Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de Câmi‘-i Kebîr mahallesi sâkinlerinden olup bundan akdem vefât eden Davud Çelebi b. el-Hâc Sefer nâm müteveffânın verâseti zevce-i metrûkesi Vildan Hâtun bt. Abdullah ile vâlidesi Saliha Hâtun bt. Davud’a ve sulbiye sagīre kızı Âişe’ye ve li ebeveyn kız karındaşları Fâtıma ve Râbia ve Âlime nâm hâtunlara münhasıra olduğu ve zikri câ’î menzil beynlerinde iktisâm olundukda tashîh-i mes’eleleri yetmiş iki sehim üzerine tashîh olunup tashîh-i merkūmdan dokuz sehmi merkūme Vildan Hâtun’a ve on iki sehmi mezbûre Saliha Hâtun’a ve otuz altı sehmi sagīre-i merkūmeye ve beş sehimden on beş sehmi mersûmât Fâtıma ve Râbia ve Âlime’ye isâbet ve intikāl eylediği hâkim-i muvakkı‘-ı kitâb -tûbâ lehû ve hüsnü me’âb- huzûrunda şer‘an zâhir ve müte‘ayyin oldukdan sonra mezbûre Saliha Hâtun asâleten ve merkūmât Fâtıma ve Râbia ve Âlime hâtunlara taraflarından husûs-ı câ’i’z-zikre vekîlleri olup merkūmânın zâtlarını ma‘rifet-i şer‘le ârifân olan Ahmed Bey b. Veli ve Mehmed Efendi b. Hasan şehâdetleriyle şer‘an vekâleti sâbite olan Mehmed Çelebi b. Abdülbâkī nâm vekîl meclis-i şer‘-i şerîf-i lâzımü’t-teşrîfde râfi‘at-i hâze’l-vesîka mezbûre Vildan Hâ[tu]n muvâcehesinde her biri bi’l-asâle ve bi’l-vekâle ikrâr ve i‘tirâf edip müteveffâ-yı mezbûrun muhallefâtından olup mahalle-i mezbûrede vâki‘ bir tarafdan Râbia Hâtun mülkü ve bir tarafdan Mustafa Çelebi b. Hüseyin mülkü ve bir tarafdan tarîk-i hâs ve bir tarafdan tarîk-i âm ile mahdûd fevkānî ve tahtânî üç bâb odaları ve bir sofa ve bir matbah ve bir kiler ve bir ahırı ve üç aded dükkânları müştemil olan mülk-i mevrûs menzilden tahrîr olunan yirmi yedi [58a] sehim hisse[-i] şer‘iyyemizi mezbûre Vildan Hâtun’a bi safkatin vâhidetin asâlet ve vekâlet-i mahkiyemiz hasebiyle yirmi üç bin beş yüz cedîd akçeye bey‘ ve teslîm ol dahi vech-i mübeyyen üzre iştirâ ve tesellüm ve kabûl ve kabz eyledikden sonra semen-i mezbûru yedinden tamâmen ahz ü kabz eyledik ba‘de’l-yevm menzil-i mezbûr[d]a vechen mine’l-vücûhi’ş-şer‘iyye bizim alâka ve medhalimiz yokdur merkūme Vildan Hâtun’un mülk-i müşterâsıdır keyfemâ yeşâ ve hasbemâ yehtâr mutasarrıf olsun dediklerinde gıbbe’t-tasdîki’ş-şer‘î mâ hüve’l-vâki‘ bi’l-ibtigā ketb olundu. Fî selhi Muharremi’l-harâm li sene sittîn ve sittîn ve elf. Şuhûdü’l-hâl: Mustafa Efendi b. Mehmed el-İmâm, Mehmed Efendi b. Abdi, Şaban Efendi b. Ebîbekir, Halil Beşe b. Hasan, Mehmed Çelebi b. Yahya