Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 254 Hüküm no: 284 Orijinal metin no: [58a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âişe Hâtun bt. Hüseyin’in Gürcü asıllı mükâteb câriyesi Fîrûz bt. Abdullah’ı bedelini ödeyerek azat ettiği Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de merhûm Baba Haydar mahallesi sâkinelerinden Âişe Hâtun bt. Hüseyin nâm hâtun tarafından husûs-ı câ’i’z-zikri ikrâra vekîli olup mezbûrenin zâtını ma‘rifet-i şer‘iyye ile ârifân olan Ali Çelebi b. Hamza ve Osman Bey b. Mehmed şehâdetleri ile şer‘an vekâleti sâbite olan Mustafa Beşe b. Ömer nâm kimesne meclis-i şer‘-i şerîfde müvekkile-i merkūmeye rıkkını mu‘terife olan işbu orta boylu açık kaşlı gök alâ gözlü Gürciyyetü’l-asl bâ‘iset-i hâzihi’l-vesîka Fîrûz bt. Abdullah nâm câriyesi muvâcehesinde bi’l-vekâle ikrâr-ı tâm ve takrîr-i kelâm edip merkūme Fîrûz müvekkilem mezbûre Âişe Hâtun’un câriye-i memlûkesi olmağla bundan esbak iki yüz elli kıt‘a riyâlî guruş-ı kebîr edâ etmek üzre kitâbete kesmişidi el-hâletü hâzihî meblağ-ı mezbûr iki yüz elli merkūmü’n-na‘t guruşu câriye-i mevsûfe-i merkūme Fîrûz yedinden bi’t-tamâm ve’l-kemâl ahz ü kabz eylediğimden sonra câriye-i mevsûfe-i mezbûreyi âzâd ve zümre-i harâir-i asliyyâta ilhâk eyledim ba‘de’l-yevm câriye-i mevsûfe-i mezbûre sâir harâir-i asliyyât gibi hürre olup üzerinde hakk-ı velâdan gayrı hakkım bâkī kalmadı dedi dedikde vekîl-i mezbûr Mustafa Beşe’nin minvâl-i mübeyyen üzre cârî ve sâdır olan ikrârını merkūme Fîrûz bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Fi’l-yevmi’l-hâmis min Saferi’l-hayr li sene sittîn ve sittîn ve elf. Şuhûdü’l-hâl: Şeyh Abdullah Efendi b. İsa, Mehmed Halîfe b. Ali el-Müezzin, Hasan Çelebi b. Veli, Yusuf Efendi b. Abdullah, Şaban Dede b. Oruc, Durmuş Beşe b. Ali, Ali Beşe b. Mustafa ve gayruhüm