Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 255 Hüküm no: 286 Orijinal metin no: [58a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hatice bt. Abdullah’ın mülk menzilinin Âişe Hâtun bt. Abdülmennân’a satılması Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de Kiremitçi Süleyman mahallesi sâkinelerinden Hatice bt. Abdullah nâm hâtun tarafından bey‘-i âti’l-beyânı ikrâra vekîl olup Ahmed Bey b. Haydar ve Mehmed Efendi b. Yusuf nâm kimesneler şehâdetleriyle şer‘an vekâleti sâbite olan fahrü’l-eşbâh Hüseyin Çelebi b. Ahmed nâm cündî meclis-i şerî’at-i şerîfede işbu sâhibetü’l-kitâb Âişe Hâtun bt. Abdülmennân mahzarında bi’l-vekâle ikrâr ve i‘tirâf edip müvekkile-i merkūme silk-i mülk-i sahîhimde münselik olup mahalle-i mezbûrede vâki‘ bir tarafdan ba‘zan Perviz Bey tasarrufunda [olan] menzil ve ba‘zan Yusuf Halîfe tasarrufunda olan vakıf menzil ve bir tarafdan Acem Çavuş menzili ve bir tarafdan Hüseyin Çelebi mülkü ve bir tarafdan tarîk-i âm ile mahdûd iki bâb tahtânî ve iki bâb fevkānî [58b] odaları ve kenîfi ve hadîkayı müştemil mülk menzilini bi cümleti’t-tevâbi‘ ve’l-levâhık mezbûre Âişe Hâtun’a dört yüz kıt‘a riyâlî guruş-ı kebîre tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi vech-i meşrûh üzre iştirâ ve tesellüm ve kabz ve kabûl eyledikden sonra semen-i mârrü’z-zikr dört yüz kıt‘a riyâlî guruşu merkūme Âişe Hâtun yedinden tamâ[men] ahz ü kabz [eyledim] min ba‘d menzil-i mahdûd-ı mezkûrda benim alâka ve medhalim kalmadı ba‘de’l-yevm mezbûre Âişe Hâtun’un mülk-i müşterâsı olmuşdur keyfemâ teşâ mutasarrıf olsun dedikde vekîl-i mezbûrun kelimât-ı mahkiyesini mersûme Âişe Hâtun vicâhen ve şifâhen tasdîk ve tahkīk etmeğin mâ hüve’l-vâki‘ bi’l-ibtigā ketb olundu. Fi’l-yevmi’l-hâmis min Saferi’l-hayr li sene sittîn ve sittîn ve elf. Şuhûdü’l-hâl: Mehmed Çelebi b. Ahmed, Halil Çelebi b. Hüdâverdi, Yusuf Halîfe b. Abdullah, Perviz Bey b. Abdullah, Ebîbekir Halîfe b. Hasan el-Müezzin, Ali Beşe b. Mustafa, Bayram Sofu b. Mehmed, Dilâver Beşe b. Abdullah