Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 257 Hüküm no: 288 Orijinal metin no: [58b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Trandafilo v. Panayot’un Yusuf b. Veli’ye sattığı un bedelinden alacağını talep ettiği Mahrûse-i İstanbul’da uncu tâ’ifesinden râfi‘-i hâze’s-sifri’ş-şer‘î Trandafilo v. Panayot nâm nasrânî meclis-i şer‘-i şerîf-i lâzımü’t-teşrîfde gözlemeci tâ’ifesinden Yusuf b. Veli nâm kimesne muvâcehesinde üzerine da‘vâ ve takrîr-i kelâm edip mezbûr Yusuf zimmetinde mikdârı beynimizde ilm-i şer‘î ile ma‘lûm yedinden müşterâ ve makbûz un semeninden bin iki yüz kırk cedîd akçe hakkım olup hâlen taleb eylediğimde vermekde te‘allül eder suâl olunup [alıverilmesin taleb ederim] dedikde gıbbe’s-suâl merkūm Yusuf cevâbında fi’l-vâki‘ müdde‘î-i mezbûr Trandafilo’ya vech-i mübeyyen üzre un bahâsından meblağ-ı mersûm bin iki yüz kırk cedîd akçe zimmetimde lâzımü’l-kazâ ve vâcibü’l-edâ deynim vardır deyû bi tav‘ihî ikrâr ve i‘tirâf etmeğin mûcebiyle ba‘de’l-ilzâm mâ hüve’l-vâki‘ bi’l-ibtigā ketb olundu. Fi’l-yevmi’s-sâlis min Saferi’l-hayr min şuhûri sene sittîn ve sittîn ve elf. Şuhûdü’l-hâl: Ali Beşe b. Mustafa, Hüseyin Beşe b. Ali, Bayram Sofu b. Mehmed, Mustafa b. Mehmed