Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 258 Hüküm no: 289 Orijinal metin no: [58b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Osman Ağa b. Ali’nin vefat eden Emine Hâtun bt. Abdullah’ta alacağı kaldığı Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de vâki‘ Hazret-i Emir Buhârî mahallesinde sâkin işbu râfi‘ü’l-kitâb Osman Ağa b. Ali nâm kimesne meclis-i şer‘-i şerîfde mahalle-i merkūme sâkinlerinden olup bundan akdem vefât eden Emine Hâtun bt. Abdullah nâm müteveffânın zevci ve muhallefâtına vaz‘-ı yed eden Murtaza Çelebi b. Abdülbâkī nâm kimesne muvâcehesinde [59a] üzerine da‘vâ ve takrîr-i kelâm edip müteveffât-ı merkūme zimmetinde cihet-i karz-ı şer‘îden bin beş yüz cedîd akçe hakkım olup meblağ-ı mezbûru kable’l-edâ fevt olmağla zimmetinde kalmışidi hattâ meblağ-ı mezbûru müteveffât-ı merkūme şuhûd huzûrunda hâl-i hayâtında ve kemâl-i akl-ı sıhhatinde ikrâr dahi etmişidi hâlen muhallefât-ı vâfiyesinden taleb ederin suâl olunsun dedikde gıbbe’s-suâl mezbûr Murtaza Çelebi cevâbında müteveffât-ı merkūmenin muhallefâtına vaz‘-ı yed eylediğini ikrâr lâkin müdde‘î-i mezbûra vech-i mübeyyen üzre meblağ-ı mezbûr bin beş yüz cedîd akçe deyni olduğunu münkir olıcak müdde‘î-i merkūm Osman Ağa’dan müdde‘âsını mübeyyine beyyine taleb olundukda udûl-i ricâlden olup mahalle-i mersûme sâkinlerinden Mehmed Efendi b. Ali ve Mustafa Efendi b. eş-Şeyh Ramazan meclis-i şer‘a li ecli’ş-şehâde hâzırân olup isre’l-istişhâd fi’l-hakīka müteveffât-ı merkūme hâl-i hayâtında müdde‘î-i mezbûr Osman Ağa’ya cihet-i karzdan bin beş yüz cedîd akçe deynim vardır deyû bizim huzûrumuzda tav‘an ikrâr ve i‘tirâf ve bizi işhâd etmişidi biz müteveffât-ı merkūmenin ikrârına şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri hayyiz-i kabûlde vâki‘a oldukdan sonra meblağ-ı mezbûru müteveffât-ı merkūmeden hâl-i hayâtında küllen ve ba‘zan ahz ü kabz veya hibe veyâhud vücûh-ı şer‘iyyeden bir vech ile müteveffât-ı mezbûrenin zimmetini ibrâ ve iskāt etmediğine merkūm Osman Ağa’ya yemîn teklîf olundukda ol dahi alâ vefki’l-mes’ûl yemîn billâhi’l-azîm etmeğin mûcebiyle ba‘de’l-hükm mâ hüve’l-vâki‘ bi’t-taleb ketb olundu. Fi’l-yevmi’s-sâmin min Saferi’l-hayr li sene sittîn ve sittîn ve elf. Şuhûdü’l-hâl: Mustafa b. Ömer el-Kadı, Mustafa b. Hasan el-Müderris, Mehmed Efendi b. Hasan el-Kadı, Ali Beşe b. Mustafa ve gayruhüm