Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 278 Hüküm no: 306 Orijinal metin no: [39b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Çelebi b. Yusuf’un pamuk satışı bedelinden Mehmed b. Yusuf’tan alacaklı olduğu Mahmiye-i İstanbul’da Sultan mahallesinde sâkin işbu bâ‘isü’l-kitâb Mustafa Çelebi b. Yusuf meclis-i şer‘-i hatîr-i lâzımü’t-tevkīrde Mehmed b. Yusuf mahzarında üzerine da‘vâ ve takrîr-i kelâm edip merkūm Mehmed zimmetinde yedimden müşterâ ve makbûz ve zâtı beynimizde ilm-i şer‘î ile ma‘lûm penbe semeninden bin dört yüz on sekiz akçe hakkım olup meblağ-ı mezbûrun sekiz yüz on sekiz akçesini bundan akdem ahz u kabz edip bâkī altı yüz akçe zimmetinde kalıp hattâ ikrâr dahi etmişidi suâl olunup alıverilmek murâdımdır dedikde gıbbe’s-suâl ve akībe’l-inkâr müdde‘î-i mezbûrdan da‘vâsını mübeyyine beyyine taleb olundukda udûl-i müslimînden olup mahmiye-i mezbûreden Azebler mahallesinden Abdülkerim b. Mustafa ve Mehmed b. Osman nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka müdde‘î-i mezbûr Mustafa Çelebi yedinden müşterâ ve makbûz beynlerinde ma‘lûm penbe semeninden bâkī zimmetinde altı yüz akçe hakkı olduğunu bizim huzûrumuzda ikrâr ve i‘tirâf eyledi, bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde gıbbe ri‘âyeti şerâiti’l-kabûl şehâdetleri makbûle oldukdan sonra meblağ-ı mezbûr altı yüz akçeyi müdde‘î-i mezbûra edâ ve teslîme mezbûr Mehmed’e tenbîh birle mâ vaka‘a bi’t-taleb ketb olundu. Fi’l-yevmi’l-ışrîn min Cumâdelâhire li sene seb‘a ve seb‘în ve elf. Şuhûdü’l-hâl: Mehmed Bey Kethüdâ-yı muhzırân, Şükrullah Bey b. Mustafa, Mehmed b. Ramazan, Baba Resul b. Rıdvan, Ramazan b. Yakub ve gayruhüm.