Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 258 Hüküm no: 290 Orijinal metin no: [59a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Beşe b. Şaban’ın berber dükkânı ile attâr dükkânını Mustafa Çelebi b. Cafer’e sattığı Medîne-i Hazret-i Ebâ Eyyûb el-Ensârî -razıye anhü rabbühü’l-Melikü’l-Bârî-de merhûm Nişâncı Paşa mahallesi sâkinlerinden Mustafa Beşe b. Şaban nâm kimesne meclis-i şer‘-i şerîf-i lâzımü’t-teşrîfde râfi‘-i hâze’l-kitâb Mustafa Çelebi b. Cafer nâm kimesne tarafından tasdîk-i câ’i’z-zikre nehc-i şer‘î üzre şer‘an vekâleti sâbite olan mezbûr Mustafa Çelebi’nin karındaşı Hüseyin Çelebi nâm kimesne muvâcehesinde bi’t-tav‘ ve’r-rızâ ikrâr ve i‘tirâf edip mahalle-i merkūmede vâki‘ bir tarafdan a‘lemü’l-ulemâ’i’l-izâm efdalü’l-fuzalâ’i’l-fihâm Bağdâdî Ahmed Efendi mülkü ve bir tarafdan yine benim mülküm ve bir tarafdan vâlidem ( ) Hâtun mülkü ve bir tarafdan tarîk-i âm ile mahdûd ve mümtâz bir bâb berber ve bir bâb attâr dükkânlarımı saçaklarıyla müvekkil-i mersûm Mustafa Çelebi’ye tarafeynden îcâb ve kabûlü hâvî bey‘-i bâtt-ı sahîh-i şer‘î ile yedi bin beş yüz cedîd akçe ile mechûlü’l-mikdâr bir kabza fülûsa bâtten bey‘ ve teslîm eylediğimde müvekkil-i müşârun-ileyh Mustafa Çelebi dahi vech-i muharrer üzre iştirâ ve tesellüm ve kabz ve kabûl eyledikden sonra semeni olan meblağ-ı mezbûru fülûs-ı mechûl-i merkūm ile müvekkil-i mezbûr yedinden bi’t-tamâm ve’l-kemâl ahz ü kabz eyledim ba‘de’l-yevm sâlifü’z-zikr dükkânlarda vechen mine’l-vücûh benim alâka ve medhalim yokdur müvekkil-i mezbûr Mustafa Çelebi’nin mülk-i müşterâsı olmuşdur keyfemâ yeşâ ve hasbemâ yehtâr mutasarrıf olsun dedikde mukırr-ı merkūm Mustafa Beşe’nin vech-i muharrer üzre cârî ve sâdır olan cemî‘ ikrârını vekîl-i merkūm Hüseyin Çelebi bi’l-muvâcehe tasdîk etmeğin mâ hüve’l-vâki‘ bi’l-ibtigā ketb olundu. Fi’l-yevmi’s-sâbi‘ min Saferi’l-hayr min şuhûri sene sittîn ve sittîn ve elf. Şuhûdü’l-hâl: Muharrirü’l-vesîka Mustafa Efendi b. Hasan, Mehmed Efendi b. Habil, Mehmed Efendi b. Abdi, İbrahim Çelebi b. Abdi, Ali Bey b. Kasım, Mustafa Beşe b. Muharrem