Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 260 Hüküm no: 293 Orijinal metin no: [59b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sâime bt. Abdullah’ın mülk menzilinin Mustafa Çelebi b. Cafer’e satılması Medîne-i Hazret-i Ebâ Eyyûb el-Ensârî -dâme fî rıdvâni’l-Bârî- mahallâtından Nişâncı Paşa mahallesi sâkinelerinden Sâime bt. Abdullah nâm hâtun meclis-i şerî’at-i şerîfede işbu sâhibü’l-kitâb Mustafa Çelebi b. Cafer nâm kimesnenin li ebeveyn karındaşı ve tarafından ikrâr-ı âti’z-zikri tasdîke vekîl-i sâbitü’l-vekâlesi olan Hüseyin Çelebi mahzarında bi tav‘ihâ ikrâr ve i‘tirâf edip emlâkimden olup mahalle-i mezbûrede vâki‘ bir tarafdan Muslu nâm kimesne tasarrufunda olan vakıf menzil ve bir tarafdan yine benim âhar mülküm ve bir tarafdan müvekkil-i mezbûr Mustafa Çelebi mülkü ve bir tarafdan a‘lemü’l-ulemâ’i’l-izâm Bağdâdî Ahmed Efendi dükkânı ile mahdûd bir bâb tahtânî odayı ve bir kileri ve havluyu müştemil mülk menzilimi cemî‘ tevâbi‘ ve levâhıkıyla müvekkil-i mezbûr Mustafa Çelebi’ye on bir bin cedîd akçe ile hîn-i kabzda muzî‘a adedi nâ-ma‘lûm bir kabza fülûs-ı [60a] mechûletü’l-kadre tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi vech-i muharrer üzre iştirâ ve tesellüm ve kabz ve kabûl eyledikden sonra semeni olan mezkûru’n-na‘t akçeyi müvekkil-i mezbûr Mustafa Çelebi yedinden tamâmen ahz ü kabz eyledim ba‘de’l-yevm menzil-i mahdûd-ı mezkûrda vechen mine’l-vücûhi’ş-şer‘iyye alâkam kalmadı müvekkil-i mezbûr Mustafa Çelebi’nin mülk-i müşterâsıdır keyfemâ yeşâ mutasarrıf olsun de[dikde] gıbbe’t-tasdîki’ş-şer‘iyyi’l-vicâhî mâ hüve’l-vâki‘ bi’t-taleb ketb olundu. Fi’l-yevmi’s-sâlis aşer min Saferi’l-muzaffer min şuhûri sene sittîn ve sittîn ve elf. Şuhûdü’l-hâl: Mehmed Efendi b. Nasuh el-İmâm, Selim Halîfe b. ( ) el-Müezzin, Ali Bey b. Kasım, Şaban Beşe b. ( ) er-Râcil, Mustafa b. Muharrem, Mehmed Bey el-Cündî, Ali Beşe b. Mustafa, Hüseyin Çelebi b. Ali, Dilâver b. ( ) ve gayruhüm