Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 261 Hüküm no: 294 Orijinal metin no: [60a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Donanma ile seferde iken şehit olan Mustafa Ağa b. Ömer’in Ahmed Ağa b. Ali Ağa’ya emânet olarak bıraktığı eşyalarının vârislerine teslim edildiği Husûs-ı câ’i’z-zikrin mahallinde ketb ü tahrîri iltimâs olunmağın kıbel-i şer‘-i kavîmden Mevlânâ Mustafa Efendi b. Hasan irsâl olunup ol dahi zeyl-i kitâbda mastûretü’l-esâmî müslimîn ile medîne-i Eyyûb’de Takyecibaşı mahallesi sâkinlerinden umdetü’l-ekârim Ahmed Ağa b. Ali Ağa’nın menziline varıp akd-i meclis-i şer‘-i şerîf eyledikde fi’l-asl mahrûse-i Konya sâkinlerinden olup bundan akdem donanma-yı hümâyûn seferinde şehîd olan merhûm Mustafa Ağa b. Ömer nâm müteveffânın verâseti zevce-i metrûkesi Âişe nâm hâtun ile sulbî oğlu Mehmed nâm sagīre münhasıra olmağla sagīr-i mezbûrun tesviye-i umûruna kıbel-i şer‘-i kavîmden mansûb vasîsi Ahmed Ağa b. Mehmed tarafından ve zevcesi Âişe Hâtun kıbelinden husûs-ı âti’z-zikre vekâlet-i mutlaka ile vekîlleri olup hasm-ı şer‘î mahzarında Mahmud Bey b. Zülfikar ve Hasan Bey b. Üveys? şehâdetleriyle şer‘an vekâlet-i sâbite olan Âdil? Paşa b. emîrü’l-ümerâ‘i’l-kirâm zü’l-kadri ve’l-ihtirâm Hasan Paşa hazretlerinin silahdârı fahrü’l-emâsil Hasan Ağa b. Sefer nâm vekîl meclis-i ma‘kūd-ı mezkûrda işbu râfi‘ü’l-kitâb müşârun-ileyh Ahmed Ağa mahzarında bi’l-vekâle ikrâr ve i‘tirâf edip müteveffâ-yı mezbûr bundan akdem donanma-yı hümâ[yû]n seferine gider oldukda emlâkinden bir kıt‘a kelâm-ı izzet ve bir samur kürk ve iki sepet sandığı ve bir kırmızı ferâce ve bir yeşil ferâce ve bir kırmızı kereke ve bir benefşî sof kereke ve bir sîm micmer ve bir gülabdân ve beş kahve makramesi ve bir çift don ve gömlek ve iki ....? ve bir mercan tesbih ve bir fağfûrî anberlik? ve kırmızı halepçe? ve üç yastık ve iki tülbent ve bir Mardin seccâdesi ve bir …? ve iki teğelti ve reşme ile üç aded sîm raht ve iki sîm reşme ile raht ve sîm Çerkesî raht ma‘a reşme ve bir kaplan postu ve üç kıt‘a mükemmel zırh ve dört kıt‘a gaddâre ve iki sîm kılıç ve bir sîm balta? ve bir sîm külünk ve dört kırmızı şirâki ve iki mâ’î kilim ve yedi kırmızı kilim ve iki Kula seccâdesi ve bir tirkeş ve bir mor çakşır ve bir kapama ve bir alaca peşkir ve bir sîm …? ve üç cilt kitâb ve dört aded eyer ve beş çift üzengi ve üç çift hizmetkâr evlerini alâ tarîki’l-vedî‘a defteriyle müşârun-ileyh Ahmed Ağa yedine teslîm ol dahi vech-i mübeyyen üzre kabz etmişidi hâlen müteveffâ-yı mezbûr tahrîr ve imzâ? eylediği defterde eşyâ-i mezbûre mastûr ve mukayyed olmağla eşyâ-i mezbûreyi ve hâric ez-defter altı aded şerbet makraması ve bir peştamal ve yedi münakkaş makrame ve üç münakkaş uçkur ve bir munakkaş bohça ve altın yaldızlı cedîd sîm raht ve …? alınan cedîd sâ‘at ve iki yüz yetmiş bir …? sîm ve otuz iki aded ok ve bir …? ve iki parça samur ve sekiz aded şişe ve bir cedîd sarı çizme ve bir kellepûş ve bir abdest makraması ve üstâzî ve bir tor kesesi ve üç doğan eldiveni ve iki ...? ve iki rub‘ benefşî mısdaka ve bir çadır perdesi ve iki tarak ve bir çuka örtülü iskemleyi müşârun-ileyh Ahmed Ağa yedinden vekâlet-i mahkiyem hasebiyle tamâmen ahz ü kabz eyledim ba‘de’l-yevm müşârun-ileyh Ahmed Ağa zimmetinde müteveffâ-yı mezbûrun ism-i mâl ıtlâk olunur bir şeyi bâkī kalmamışdır bi’l-vekâle zimmetini ibrâ ve iskāt eyledim dedikde vekîl-i mezbûru cemî‘ ikrâr-ı meşrûhunda mezbûr Ahmed Ağa vicâhen tasdîk ve şifâhen tahkīk eylediğini Mevlânâ-yı mezbûr [mahallinde] ketb ü tahrîr ba‘dehû meclis-i şer‘de alâ vukū‘ihî inhâ ve takrîr? etmeğin mâ hüve’l-vâki‘ bi’t-taleb ketb olundu. Fi’l-yevmi’s-sâlis aşer min Saferi’l-hayr sene sittîn ve sittîn ve elf. Şuhûdü’l-hâl: Mustafa Efendi b. İbrahim el-Müderris, Sinan Efendi b. Derviş el-...?, Rıdvan Ağa b. Abdülbâkī, Mahmud Bey b. Ali, Mehmed Çelebi? b. Mahmud, Ömer Bey b. Mehmed el-Cündî?, Hasan Odabaşı b. Ahmed, ...? Ağa b. Ali, Mehmed Çelebi b. Yusuf, Durmuş b. Mehmed el-Cündî ve gayr