Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 262 Hüküm no: 295 Orijinal metin no: [60b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Eski Eflak Beyi …? v. İstefan’ın Kosta v. Andriye’de kalan alacağını vârislerinden dava ettiği ve sulh oldukları İstanbul’da Kasım Ağa mahallesi sâkinlerinden olup bundan esbak Eflak Beyi olan umdetü’l-ümerâ‘i’l-İseviyye ...? v. İstefan nâm nasrânî meclis-i şer‘-i şerîfde bundan akdem hâlik olan Kosta v. Andriye nâm zimmînin verâseti sulbî kebîr oğlu Andriye ile sulbiye kebîre kızı Nera nâm nasrâniyeye münhasıra olduğu müte‘ayyin olmağla mezbûrân Andriye ve Nera taraflarından husûs-ı âtîye bimâ hüve tarîku’t-tevellî şer‘an vekâleti sâbite olan merkūme Nera’nın zevci râfi‘-i hâze’s-sifr Niko nâm zimmî muvâcehesinde ikrâr-ı tâm ve takrîr-i kelâm edip hâlik-i mezbûr zimmetinde cihet-i iltizâmından iki yüz kıt‘a riyâlî guruş hakkım olup meblağ-ı mezbûru metrûkât-ı v[â]fiyesinden da‘vâ eylediğimde beynimizde münâza‘ât-ı kesîre cereyânından sonra vesâ[ta]t-i muslihîn ile meblağ-ı mezbûr da‘vâsından beni an ikrâr otuz dört bin beş yüz cedîd akçe üzerine sulh eylediklerinde ben dahi meblağ-ı mezbûru kabûl ve bedel-i sulh-ı mezbûru vekîl-i merkūm Niko yedinden tamâmen ahz ü kabz edip meblağ-ı mezbûr (….) cemî‘ da‘vâdan mezbûrân Andriye ve Nera’nın zimmetlerini ibrâ ve iskāt eyledim min ba‘d da‘vâm yokdur sudûr dahi ederse lede’l-hükkâmi’l-kirâm istimâ‘ olunmaya dedikde gıbbe’t-tasdîki’ş-şer‘î mâ hüve’l-vâki‘ bi’l-ibtigā ketb olundu. Fi’l-yevmi’l-hâmis aşer min Saferi’l-hayr li sene [1066] Şuhûdü’l-hâl: Hüseyin Beşe b. Mehmed, Kurd Beşe b. Abdülbâkī, Kara Mehmed b. Mehmed, Mehmed Beşe b. Mehmed, Ali Beşe b. Mustafa