Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 263 Hüküm no: 296 Orijinal metin no: [60b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. ..? v. Yad? ..? v. Dimo’nun mülk menzilinin Cafer Ağa b. Hasan’a satıldığı ve bedelinin kefil olduğu Cafer Ağa’nın İstanbul patriğindeki alacağı ile takas ettikleri Mahrûse-i Kostantıniyye hısnı ebvâbından Fener kapısı hâricinde Abdi Subaşı mahallesi sâkinlerinden (…) v. Yad? ..? v. Dimo nâm nasrânî tarafından bey‘-i câ’i’z-zikri ikrâra vekîl olup hasm-ı şer‘î-i câhid mahzarında (….) b. Şaban ve Halil Beşe b. Mehmed şehâdetleriyle şer‘an vekâleti sâbite olan Mustafa Beşe b. (...) meclis-i şer‘-i şerîf-i lâzımü’t-tevkīrde işbu râfi‘ü’l-kitâbi’l-müstetâb umdetü’l-emâcid ve’l-ekârim Cafer? b. Hasan nâm kimesne muvâcehesinde bi’l-vekâle ikrâr ve i‘tirâf edip silk-i mülk-i sahîhimde [münselik] ve muntazam olup mahalle-i mezbûrede vâki‘ bir tarafdan Manolalı v. ( ) nâm nasrânî mülkü (...) …? demekle ma‘rûf nasrânî mülkü ve bir tarafdan sâhil-i bahr ve bir tarafdan tarîk-i âm ile [mahdûd] olup muhavvata-i dâhiliyesi iki bâb fevkānî odayı ve bir kahve odasını ve yine bir bâb (...) odayı ve bir bâb kebîr odayı ve dalyanı ve kenîfi ve taşrada sokak kapısı kurbunda (...) ve bir ahırı müştemil olan mülk menzilimi cümle tevâbi‘ ve levâhıkı ve menâfi‘ ve merâfıkı ile müşterî-i [mezbûr] Cafer Ağa’ya tarafeynden îcâb ve kabûlü hâvî bey‘-i bâtt-ı sahîh-i şer‘î ile beş yük yirmi [bin] cedîd akçeye bâtten bey‘ ve teslîm eylediğimde müşârun-ileyh Cafer Ağa dahi vech-i mübeyyen üzre iştirâ ve tesellüm ve kabz ve kabûl eyledikden sonra semeni olan meblağ-ı mezbûru müşârun-ileyh Cafer Ağa’nın hâlen İstanbul keferesi patriği zimmetinde olan kezâlik beş yük yirmi bin cedîd [akçeye] ben kefâlet-i şer‘iyye ile kefîl bi’l-mâl olmağla hâlen vech-i muharrer üzre cihet-i kefâletden müşârun-ileyh Cafer Ağa’ya deynim olan beş yük yirmi bin cedîd akçe hakkıyla takas edip müşârun-ileyh Cafer Ağa dahi minvâl-i mübeyyen üzre mukāssa ve kabûl eyledi ba‘de’l-yevm menzil-i mahdûd-ı mezkûrda vechen mine’l-vücûhi’ş-şer‘iyye ve sebeben mine’l-esbâbi’l-mer‘iyye benim alâka ve medhalim yokdur müşârun-ileyh Cafer Ağa’nın mülk-i müşterâsıdır keyfemâ yeşâ ve hasbemâ yehtâr mutasarrıf olsun dedikde vekîl-i merkūmun vech-i meşrûh üzre cârî ve sâdır olan cemî‘ ikrâr ve i‘tirâfını müşârun-ileyh Cafer Ağa bi’l-muvâcehe tasdîk ve bi’l-müşâfehe tahkīk etmeğin mâ hüve’l-vâki‘ ketb olundu. Fi’l-yevmi’r-râbi‘ aşer min Saferi’l-hayr li sene sittîn ve sittîn ve elf. Şuhûdü’l-hâl: Mehmed Efendi b. Mehmed el-Hatîb, Mustafa Efendi b. Hasan, Receb Efendi b. Abdi, es-Seyyid Zeynelâbidin Çelebi, es-Seyyid Ali Çelebi b. Mehmed, İsmail Çelebi b. Mehmed, Osman Bey b. Ahmed, el-Hâc Mahmud çukadâr, Mustafa Beşe b. Mustafa, Hüseyin Beşe b. Ali ve gayr