Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 264 Hüküm no: 298 Orijinal metin no: [61a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Müslüman olduğu için boşanan Hatice Hâtun’un eski kocası Bogas v. Beyler’de muhtelif eşyasının kaldığı iddiasını ispatlayamadığı Bundan esbak şeref-i İslâm ile müşerrefe olan Hatice Hâtun bt. Abdullah nâm mühtediyye meclis-i şerî’at-i şerîfede zevci işbu bâ‘isü’s-sifr Bogas v. Beyler nâm Ermeni muvâcehesinde üzerine da‘vâ ve takrîr-i kelâm edip mezbûr Bogas zevcim olup bundan akdem ben şeref-i İslâm ile müşerrefe olduğumda mezbûr Bogas’a dahi İslâm arz olundukda ibâ etmekle hâlen ben kendiden mutallaka oldum, lâkin mezbûr Bogas kendi mülküm olup yedinde olan mintanlık hâre ve iki velençe ve bir döşek ve dört sahan ve iki tencere ve dört yastık…? küpe ve iki yorganımı vermede te‘allül eder suâl olunup teslîme tenbîh olunmak murâdımdır dedikde gıbbe’s-suâl merkūm Bogas Ermeni cevâbında müdde‘î-i mezbûre bundan esbak vech-i muharrer üzre zevcesi olduğunu ve yedinde emlâkinden bir Şam alacası dizlik ve bir divli alaca müsta‘mel kaftan ve bir turuncu dârâyî kaftan ve bir köhne satrancî dirlik ve bir sandığı olduğunu ikrâr, lâkin eşyâ-i merkūmeyi [münkir] olıcak müdde‘iye-i merkūmeden da‘vâsına muvâfık beyyine taleb olundukda ikāmet-i beyyineden izhâr-ı acz edip istihlâf etmeğin fi’l-vâki‘ müdde‘iye-i merkūmenin emlâkinden bâlâda zikr olunan eşyâ yedinde olup vaz‘-ı yed eylediğine mersûm Befas’a yemîn teklîf olundukda ol dahi yemîn billâhi’llezî enzele’l-İncîle ( ) tenbîh ve ol vechile müdde‘iye-i mersûme bî-vech ta‘arruzdan men‘ olunup mâ hüve’l-vâki‘ gıbbe’t-taleb ketb olundu. Fi’s-sâlis ve’l-ışrîn min Zilhicceti’ş-şerîfe min şuhûri sene sittîn ve sittîn ve elf min hicreti men lehü’l-izzu ve’ş-şeref. Şuhûdü’l-hâl: Ali Beşe b. Mustafa, Hüseyin Beşe b. Ali, Bayram Dede b. Mehmed, Mustafa Beşe b. Mehmed, Abdi Beşe b. İskender ve gayruhüm mine’l-hâzırîn