Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 265 Hüküm no: 299 Orijinal metin no: [61a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âişe bt. Abdullah’ın kendisini boşayan Mahmud Beşe’den haklarının tamamını aldığı Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de vâki‘ Câmi‘-i kebîr mahallesi sâkin[e]lerin[den] Âişe bt. Abdullah nâm hâtun meclis-i şer‘-i şerîf-i lâzımü’t-teşrîfde zevc-i sâbıkı işbu hâmilü’l-vesîka Mahmud Beşe b. Abdülmennân nâm râcil mahzarında ikrâr-ı tâm ve takrîr-i kelâm edip mezbûr Mahmud Beşe bundan akdem zevcim olup lâkin hüsn-i mu‘âşeretimiz olmamağla beni talâk-ı bâ’in ile tatlîk etmişidi el-hâletü hâzihî zimmetinde mütekarrir olan bin cedîd akçe mehr-i müeccel ve nafaka-i iddet ve me’ûnet-i süknâm mukābelesinde dört yüz seksen cedîd akçe ki cem‘an bin dört yüz seksen cedîd akçe hakkımı mezbûr Mahmud yedinden bi’t-tamâm ve’l-kemâl ahz ü kabz edip zevciyete müte‘allik cemî‘ de‘âvî ve mütâlebât ve eymân [ve] muhâsamâtdan mezbûr Mahmud Beşe’nin zimmetini ibrâ-i âmm-ı kātı‘ü’n-nizâ‘ ile ibrâ ve iskāt eyledim min ba‘d da‘vâ ve nizâ‘ım yokdur sudûr dahi ederse lede’l-hükkâmi’l-kirâm mesmû‘a olunmaya dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’l-ışrîn min Zilhicceti’ş-şerîfe li sene hamsin ve sittîn ve elf. Şuhûdü’l-hâl: Ömer Beşe b. Osman, Mehmed Beşe b. Hasan, Ali Beşe b. Mustafa, Hüseyin Beşe b. Ali, Mahmud Beşe b. Receb, Bayram Sofu b. Mehmed, Abdi Beşe b. İskender, Dilâver Bey b. Abdullah ve gayr