Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 266 Hüküm no: 300 Orijinal metin no: [61a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Abdülmennân’ın muhtelif eşya ile mehrini kocası Ali’ye hibe ettiği Medîne-i Hazret-i Ebâ Eyyûb el-Ensârî’de Kasım Paşa mahallesi sâkinelerinden Fâtıma bt. Abdülmennân nâm hâtun meclis-i şer‘-i şerîfde zevci işbu sâhibü’l-kitâb Ali b. Ömer nâm kimesne mahzarında tav‘an ikrâr edip silk-i mülkümde münselik emlâkimden bir beledî döşek ve iki yemeni yorgan ve üç beledî yastık ve iki minder ve bir alaca kilim ve bir tencere ve bir sahan ile yine mezbûr Ali zimmetinde mütekarrir olan üç yüz cedîd akçe mehr-i müeccelimi zevcim mezbûr Ali’ye hibe-i sahîha-i şer‘iyye ile hibe ve teslîm ve temlîk edip ol dahi meclis-i hibede eşyâ-i merkūmeyi vech-i meşrûh üzre ittihâb ve tesellüm ve temellük ve kabz ve kabûl eyledikden sonra min ba‘d eşyâ-i mezbûrede vechen mine’l-vücûhi’ş-şer‘iyye alâka ve medhalim kalmadı zevcim mezbûrun emlâk-i mevhûbesi olmuşdur keyfemâ yeşâ ve hasbemâ yehtâr mutasarrıf olsun dedikde gıbbe’t-tasdîki’ş-şer‘iyyi’l-vicâhî mâ hüve’l-vâki‘ bi’t-taleb ketb olundu. Fi’l-yevmi’l-hâmis ve’l-ışrîn min Zilhicceti’ş-şerîfe li sene hamsin ve sittîn ve elf. Şuhûdü’l-hâl: Mehmed Çelebi b. Abdullah, İbrahim Halîfe b. Hasan, Mustafa Beşe b. Abdullah, Receb Beşe b. Abdullah, Abdi b. İskender, Dilâver b. Abdullah ve gayr