Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 266 Hüküm no: 301 Orijinal metin no: [61b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Viladin’in oğulları Nikola ile Marko’nun mülk menzillerini sattıkları Vilâyet-i Rumeli’nde Filorine kazâsına tâbi‘ Lerolani nâm karye sâkinlerinden Nikola ve Marko veledey Viladin nâm zimmîler meclis-i şer‘-i şerîfde işbu râfi‘ü’l-vesîka Nişo v. Garoyo nâm zimmî muvâcehesinde bi tav‘ihî ikrâr ve i‘tirâf edip silk-i mülkümüzde münselik olup karye-i mezbûrede vâki‘ bir tarafdan Metso ve ( ) mülkü ve bir tarafdan Miho mülkü ve bir tarafdan Angeliko mülkü ve bir tarafdan ba‘zan Mahmud Çelebi bahçesi ve ba‘zan tarîk-i âm ile mahdûd bir bâb tahtânî odayı ve bir kileri ve bir mikdâr bahçeyi ve bir kıt‘a harman yerini müştemil mülk menzilimi cümle tevâbi‘iyle merkūm Nişo’ya iki bin cedîd akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ edip ol dahi vech-i muharrer üzre iştirâ ve kabûl eyleyip semen olan mârrü’z-zikr iki bin akçeyi mersûm Nişo yedinden tamâmen ahz ü kabz eylediğimizden sonra mebî‘-i mahdûdu mahallinde zabt ve tasarrufa mezbûr Nişo’yu tarafımdan taslît eyledim dediklerinde gıbbe’t-tasdîki’ş-şer‘iyyi’l-vicâhî mâ hüve’l-vâki‘ bi’t-taleb ketb olundu. Fi’l-yevmi’l-hâmis ve’l-ışrîn min Zilhicceti’ş-şerîfe li sene hamsin ve sittîn ve elf. Şuhûdü’l-hâl: Ali b. Mustafa, Abdullah b. İskender, Dilâver b. Abdullah, Hüseyin b. Ali, Tömko? v. Yoğça?, Piko v. Yuvan, Andon v. Marko, Nikola v. Alko, Dimo v. Yani ve gayr