Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 270 Hüküm no: 307 Orijinal metin no: [62b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Mehmed’in Rus asıllı kölesi Yusuf b. Abdullah’ı vasiyet yoluyla azat ettiği Mahrûse-i İstanbul’da Hatice Sultan mahallesi sâkinelerinden Fâtıma bt. Mehmed nâm hâtunun vâlidesi ve tarafından tedbîr-i câ’i’z-zikri ikrâra vekîl olup mezbûrenin zâtını ma‘rifet-i şer‘le ârifân olan Şaban Efendi b. Ebîbekir ve Ali Çelebi b. Ebîbekir şehâdetleriyle vekâleti şer‘an sâbite olan Havva bt. Davud nâm hâtun meclis-i şer‘-i şerîf-i lâzımü’t-teşrîfde müvekkile-i merkūmeye rıkkını mu‘terif işbu orta boylu gök elâ gözlü açık kaşlı Rusiyyü’l-asl Yusuf b. Abdullah nâm gulâm muvâcehesinde bi’l-vekâle ikrâr ve i‘tirâf edip gulâm-ı mevsûf-ı mezbûru tedbîr-i mukayyed ile tedbîr eyledi gulâm-ı mevsûf-ı mezbûr mevtimden kırk gün mukaddem âzâd olup sâir ahrâr gibi hür olsun [dedi] dedikde gıbbe’t-tasdîki’ş-şer‘iyye mâ hüve’l-vâki‘ bi’l-ibtigā ketb olundu. Fi’l-yevmi’l-hâmis min Saferi’l-hayr li sene sittîn ve sittîn ve elf. Şuhûdü’l-hâl: Ali Çelebi b. Murtaza, Mehmed Beşe b. Ahmed, Ali Çelebi b. Mehmed, el-Hâc Mehmed b. Yahya, Ali Beşe b. Mustafa, Hüseyin b. Ali