Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 271 Hüküm no: 308 Orijinal metin no: [62b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Cafer Paşa’nın vakfettiği paranın yeni mütevellisi Halil Çelebi ile eski mütevelli Hasan Çelebi’nin muhasebeleri Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de vâki‘ merhûm Cafer Paşa vakf eylediği nukūda bi’l-fi‘il mütevellî olan işbu râfi‘ü’l-kitâb Halil Çelebi b. Hüdâverdi meclis-i şer‘-i şerîf-i lâzımü’t-teşrîfde vakf-ı mezbûra sâbıkan mütevellî olan Hasan Çelebi b. Mustafa mahzarında ikrâr-ı tâm ve takrîr-i kelâm edip mezbûr Hasan Çelebi tevliyet-i mezbûreden azl ve yerine ben mütevellî nasb ve ta‘yîn olundukda mürtezika-i vakıf huzûrunda muhâsebesin gördüğümüzde mâl-ı vakf-ı mezbûrdan dört yük bin yüz seksen akçesini zimem-i nâsda yerli yeriyle gösterip ben dahi kabûl eyledim hâlen asl-ı mâl-ı vakf-ı mezbûrdan merkūm Hasan Çelebi zimmetinde doksan yedi bin iki yüz yirmi akçe kalmışdır, suâl olunup ikrârı tahrîr olunmak matlûbumdur dedikde gıbbe’s-suâl mezbûr Hasan Çelebi cevâbında fi’l-hakīka ben vakf-ı mezbûra mütevellî olduğumda dört yük doksan sekiz bin dört yüz akçe kabz etmişimdir lâkin ba‘zı harca ve levâzıma sarf etmekle asl-ı mâl-ı vakf-ı mezbûrun dört yük bin yüz seksen akçesini zimem-i nâsdan mezbûr Halil Çelebi’ye teslîm eylediğimden sonra hâlen vech-i mübeyyen üzre asl-ı mâl-ı vakf-ı mezbûrdan zimmetimde doksan yedi bin iki yüz yirmi cedîd akçe lâzımü’l-edâ deynim vardır deyû bi tav‘ihî ikrâr ve i‘tirâf edicek ikrârı mûcebiyle ba‘de’l-hükm mâ hüve’l-vâki‘ bi’t-taleb ketb olundu. Fî evâhiri Saferi’l-hayr li sene sittîn ve sittîn ve elf min hicreti men lehü’l-izzu ve’ş-şeref. Şuhûdü’l-hâl: Mehmed Çelebi b. Ahmed el-Bevvâb, muharrirü’l-hurûf Mustafa Efendi [b.] Hasan, Receb Efendi b. Abdi, Ali Beşe b. Mustafa, Hüseyin b. Ali, Bayram Sofu b. Mehmed, Abdi b. İskender ve gayr