Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 271 Hüküm no: 309 Orijinal metin no: [63a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yorgi v. Yani’nin kızı Panayote’yi içindeki eşyalarla birlikte mülk menzilinin yarısı ile muhtelif emlâkının yarısını sattığı, tasarrufundaki sekiz tarlanın tasarruf hakkının yarısını devrettiği Cezîre-i Mora sancağında Karitine kazâsına tâbi‘ İstimçe? nâm karye sâkinlerinden Yorgi v. Yani nâm nasrânî meclis-i şer‘-i şerîf-i lâzımü’t-teşrîfde sulbiye kebîre kızı Panayote nâm nasrâniyenin zevci ve tarafından tasdîk-i câ’i’z-zikri vekîl-i şer‘î râfi‘ü’s-sifri’ş-şer‘î Panayot v. Yorgi nâm nasrânî muvâcehesinde bi tav‘ihî ikrâr ve i‘tirâf edip karye-i merkūmede vâki‘ bir tarafdan cebel ve bir tarafdan vâdi ve bir tarafdan Yorgi v. İspelyot nâm zimmî mülkü ve bir tarafdan tarîk-i âm ile mahdûd ve mümtâz olup bir bâb tahtânî odayı ve bir mikdâr havluyu müştemil mülk menzilimin nısfını ve yine karye-i mezbûrede vâki‘ lede’l-cîrân ma‘lûmü’l-hudûd bir kıt‘a mülk bağımın nısfını ve yine bir kıt‘a mülk bostan nısfını ve bir kıt‘a gars yerimin nısfını ve yine mevâzi‘-i adîdede vâki‘ yirmi altı dip dut ağacının nısfların bi safkatin vâhidetin iki yüz kıt‘a riyâlî guruş-ı kebîre kızım mezbûre Panayote’ye bey‘-i kat‘î ile bâtten bey‘ edip kızım merkūme dahi vech-i mübeyyen üzre iştirâ ve kabûl eyledikden sonra yine karye-i mezbûrede mevâzi‘-i müteferrikada vâki‘ her birinin hudûdu beynimizde ma‘lûm sekiz kıt‘a tarlalarımın nısflarının hakk-ı tasa[rru]fların dahi kızım mezbûre Panayote’ye yirmi beş kıt‘a riyâlî guruş bedel mukābelesinde ferağ ve tefvîz ol dahi ma‘rifet-i sâhib-i arz ile tefevvuz ve kabûl eyledikden sonra semen-i merkūm ile bedel-i mezbûr cem‘an iki yüz yirmi beş kıt‘a riyâlî guruşu kızım merkūme yedinden tamâmen ahz ü kabz eylediğimden sonra emlâk-i mezbûrenin ve menzil-i mezbûr içinde mevcûd evânî-i nühâsiyye ve gayr-ı nühâsiyyenin nısflarını ve ol tarlaların nısflarını mahallinde zabt ve tasarrufa kızım mezbûre Panayote’yi tarafımdan taslît eyledim dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’r-râbi‘ ve’l-ışrîn min Saferi’l-hayr li sene sittîn ve sittîn ve elf. Şuhûdü’l-hâl: Ali Beşe b. Mustafa, Hüseyin Çelebi b. Ali, Bayram Sofu b. Mehmed, Ahmed b. Mehmed, Abdi b. İskender, Yani v. Yorgi, Polharoni, Diyanlo, Dimo, Yani, Yorgi, Panayot