Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 272 Hüküm no: 310 Orijinal metin no: [63a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Ramazan’ın mülk menzilini Rıdvan b. Abdullah ile zevcesi Kerime bt. Abdülmennân’a sattığı Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de Baba Haydar mahallesi sâkinlerinden Mehmed b. Ramazan nâm şâb meclis-i şerî’at-i şerîfede işbu sâhibü’l-kitâb Rıdvan b. Abdullah nâm kimesne ile zevcesi Kerime bt. Abdülmennân nâm hâtun mahzarlarında tav‘an ikrâr ve i‘tirâf edip silk-i mülkümde münselik olup mahalle-i mezbûrede vâki‘ bir tarafdan Yusuf Bey b. Abdullah mülkü ve bir tarafdan Sefer Beşe b. Abdullah mülkü ve bir tarafdan Kurşuncu kızı Âişe Hâtun mülkü ve bir tarafdan tarîk-i âm ile mahdûd fevkānî ve tahtânî iki bâb odaları ve bir sofayı ve kenîfi ve eşcâr-ı müsmire ve gayr-ı müsmire bahçeyi müştemil mülk menzilimi cemî‘ tevâbi‘ ve levâhıkıyla mersûm Rıdvan ve zevcesi merkūme Kerime Hâtun’a on iki bin beş yüz cedîd akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm anlar dahi vech-i muharrer üzre ber vech-i iştirâk mutasarrıf olmak üzre iştirâ ve tesellüm ve kabz ve kabûl eyledikden sonra semen-i mârrü’z-zikr on iki bin beş yüz akçeyi merkūmân yedlerinden tamâmen ahz ü kabz ve kabûl eyledim ba‘de’l-yevm menzil-i mahdûd-ı mezkûrda vechen mine’l-vücûhi’ş-şer‘iyye alâkam kalmadı mezbûrân Rıdvan ve zevcesi Kerime Hâtun’un mülk-i müşterâsıdır keyfemâ yeşâ’[ân] mutasarrıf olsunlar dedikde gıbbe’t-tasdîki’ş-şer‘iyyi’l-vicâhî mâ vaka‘a bi’t-taleb ketb olundu. Fi’l-yevmi’l-ışrîn min Saferi’l-hayr li sene sittîn ve sittîn ve elf. Şuhûdü’l-hâl: Abdullah Efendi b. İsa, Mehmed Çelebi b. Ali, Şaban Dede b. Oruc, Ahmed Çelebi b. Ali, Ahmed Çelebi b. Mehmed, Selim Beşe b. Abdullah, Ahmed Beşe b. Sefer, Hüseyin b. Ali ve gayr