Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 273 Hüküm no: 311 Orijinal metin no: [63b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Abdülmennân’ın Nikola v. Yani’de daha önce sattığı mülk menzil bedelinden alacağı kaldığı Havâss-ı Kostantıniyye -hama’llâhu te‘âlâ ani’l-âfet ve’l-beliyye- kazâsına tâbi‘ Çekmece-i suğrâ nâhiyesi ihtivâsından Safra demekle ma‘rûfe karye sâkinlerinden Mehmed b. Abdülmennân nâm kimesne meclis-i şer‘-i şerîf-i lâzımü’t-teşrîfde işbu râfi‘ü’s-sifr Nikola v. Yani nâm nasrânî muvâcehesinde bi tav‘in sâf ikrâr ve i‘tirâf edip karye-i merkūmede vâki‘ bir tarafdan Paroş v. ( ) mülkü ve bir tarafdan Hasan Beşe [b.] Abdullah mülkü ve bir tarafdan tarîk-i hâs ve bir tarafdan tarîk-i âm ile mahdûd olup bir bâb tahtânî odayı ve havluyu müştemil menzil mülküm olup târih-i kitâbdan altı sene mukaddem mezbû[r] Nikola’ya sekiz bin cedîd akçeye bey‘-i kat‘î ile bey‘ ve teslîm ol dahi iştirâ ve tesellüm ve kabz ve kabûl eyledikden sonra semen olan meblağ-ı mezbûrun târih-i merkūmda altı bin akçesini yedinden kabz edip iki bin akçe zimmetinde bâkī kalmışidi hâla semen-i bâkī iki bin akçeyi dahi merkūm Nikola yedinden bi’t-tamâm ve’l-kemâl ahz ü kabz eyledim ba‘de’l-yevm menzil-i mahdûd-ı mezkûr semeninden merkūm Nikola zimmetinde bir akçe ve bir habbe hakkım bâkī kalmadı menzil-i mezbûr mülk-i müşterâsıdır keyfemâ yeşâ ve hasbemâ yehtâr mutasarrıf olsun dedikde gıbbe’t-tasdîki’ş-şer‘î mâ hüve’l-vâki‘ bi’l-ibtigā ketb olundu. Fi’l-yevmi’s-sâlis ve’l-ışrîn min Saferi’l-hayr li sene sittîn ve sittîn ve elf. Şuhûdü’l-hâl: Ali Beşe b. Mustafa, Şaban Çavuş b. Abdullah, Mehmed Beşe b. Abdülbâkī, Ali Beşe b. Hasan, Mehmed Beşe b. Abdullah