Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 273 Hüküm no: 312 Orijinal metin no: [63b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rıdvan b. Abdullah ile zevcesi Kerime’nin mülk menzillerini İbrahim b. Ali’ye sattıkları Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de Nişâncı Paşa mahallesi sâkinlerinden Rıdvan b. Abdullah nâm kimesne ile zevcesi Kerime bt. Abdullah nâm hâtun meclis-i şerî’at-i şerîfde işbu sâhibü’l-kitâb İbrahim b. Ali nâm kimesnenin vâlidesi ve tarafından ikrâr-ı âti’z-zikri tasdîke vekîl olup bimâ hüve nehcü’s-sübût şer‘an vekâleti sâbite olan Gülistan bt. Abdullah nâm hâtun mahzarında her biri tâyi‘an ikrâr ve i‘tirâf edip silk-i mülkümüzde münselik olup mahalle-i merkūmede vâki‘ bir tarafdan Medîne-i Münevvere vakfı olan menzil ve iki tarafdan müvekkil-i mezbûr İbrahim mülkü ve bir tarafdan tarîk ile mahdûd bir bâb fevkānî odayı ve sundurmayı ve bir bâb tahtânî odayı ve havluyu müştemil mülk menzilimi[zi] cümle tevâbi‘ ve levâhıkıyla müvekkil-i mezbûr İbrahim’e altı bin altı yüz cedîd akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ol dahi vech-i muharrer üzre iştirâ ve tesellüm ve kabz ve kabûl eyledikden sonra semeni olan meblağ-ı mezbûr altı bin altı yüz akçeyi müvekkil-i merkūm yedinden tamâmen ahz ü kabz eyledik ba‘de’l-yevm menzil-i mezkûrda vechen mine’l-vücûhi’ş-şer‘iyye bizim alâka ve medhalimiz kalmadı müvekkil-i mezbûrun mülk-i müşterâsıdır keyfemâ yeşâ ve yehtâr mutasarrıf olsunlar dediklerinde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’l-hâmis ve’l-ışrîn min Saferi’l-hayr li sene sittîn ve sittîn ve elf. Şuhûdü’l-hâl: Mustafa Çelebi ve Hüseyin Çelebi ibney Cafer, Mehmed Efendi b. Nasuh el-İmâm, Selim Halîfe b. Veli el-Müezzin, Mahmud Beşe b. Abdullah, Ali Bey b. Kasım, Mehmed Beşe b. Turâbî, Mehmed Bey b. ( ) el-Cündî, Ali Beşe b. Mustafa, Hüseyin Beşe b. Ali, Bayram Sofu b. Mehmed, Abdullah Beşe b. İskender ve gayr