Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 274 Hüküm no: 313 Orijinal metin no: [63b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Aleksi v. Yani’nin borcuna karşılık mülk menzilini ve bağını rehin verdiği Havâss-ı Kostantıniyye kazâsına tâbi‘ Çekmece-i suğrâ nâhiyesine tâbi‘ Safra nâm karye sâkinlerinden Aleksi v. Yani nâm zimmî meclis-i şer‘-i şerîfde işbu ashâbü’l-vesîka Foti v. Nikola ve Yani v. Dırago ve Kika v. İstoyo ve İstanpo v. Siro ve Todori v. Cevriye ve Duka v. Boga ve Yorgo v. Yago ve Yorgo v. Yani ve İstati v. Köni ve Yani v. Kiro ve Kiro v. Köni ve İspandon v. Yorgi nâm zimmîler muvâcehelerinde [64a] bi tav‘ihî ikrâr ve i‘tirâf edip mezbûrûn zimmîlere cihet-i deyn-i şer‘îden târih-i kitâbdan elli gün tamâmına değin müeccel ve mev‘ûd yüz yirmi iki bin yüz bir cedîd akçe zimmetimde lâzımü’l-edâ ve vâcibü’l-kazâ deynim olmağla emlâkimden olup karye-i mezbûrede vâki‘ bir tarafdan İstefani v. Dimitri mülkü ve bir tarafdan Trandafilo v. Manol nâm zimmî mülkü ve bir tarafdan mîrî ahır ve bir tarafdan tarîk-i âm ile mahdûd olan mülk menzilim ile bir kıt‘a mülk bağımı meblağ-ı mezbûr mukābelesinde mezbûrûn zimmîler yedine rehin vaz‘ ve teslîm, onlar dahi vech-i mübeyyen üzre irtihân ve tesellüm ve kabz ve kabûl eylediler dedikde gıbbe’t-tasdiki’ş-şer‘iyye yine mezbûr Aleksi merkūmûn Foti ve Yani ve Kika ve sâirleri muvâcehelerinde i‘âde-i kelâm edip eğer ecel-i mev‘ûd hulûlünde meblağ-ı merkūm yüz yirmi iki bin yüz bir cedîd akçeyi mersûmûn zimmîlere edâ ve teslîm etmezsem menzil-i mahdûd-ı mezkûru ve ol bağı ve ol karye-i merkūmede mevâzi‘-i adîdede vâki‘ her birinin hudûdu beynimizde ma‘lûm yirmi kıt‘a tasarrufumda olan tarlaları dahi âhara bey‘ ve tefvîz ve semen ve bedelini ba‘de’l-kabz deyn-i mezbûru istîfâ edip fazla kalırsa bana teslîm etmek üzre merkūmûn Foti ve Yani ve Kika’yı azl ve in‘izâlden masûn vekâlet-i devriyye ile tarafımdan vekîl ve nâib-i menâb nasb ve ta‘yîn eyledim dedikde anlar dahi vekâlet-i merkūmeyi kabûl ve hizmet-i lâzımesin her biri edâya ta‘ahhüd ve iltizâm etmeğin mâ hüve’l-vâki‘ bi’t-taleb ketb olundu. Fi’l-yevmi’l-hâmis ve’l-ışrîn min Saferi’l-hayr li sene sittîn ve sittîn ve elf. Şuhûdü’l-hâl: Ali Beşe b. Abdi, Ahmed Beşe b. Mehmed, Kadri b. Ahmed, Kasım Beşe b. Mehmed, Mehmed Beşe b. Hasan, Mehmed b. Hüseyin, Ali Beşe b. Mustafa, Hüseyin Beşe b. Ali, Abdi Beşe b. İskender, Bayram Sofu b. Mehmed, Mustafa Beşe b. Mehmed, Dilâver Bey b. Abdullah ve gayr