Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 275 Hüküm no: 314 Orijinal metin no: [64a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Diyani v. Agapo’nun mülk menzil, bağ ve harman yerini oğlu Aleksi’ye sattığı ve tarlalarının da tasarrufunu devrettiği Havâss-ı Kostantıniyye kazâsına tâbi‘ Çekmece-i suğrâ nâhiyesi ihtivâsından Safra demekle ma‘rûf karye sâkinlerinden Diyani v. Agapo nâm zimmî meclis-i şer‘-i şerîfde sulbî kebîr oğlu işbu râfi‘ü’l-vesîka Aleksi nâm zimmî muvâcehesinde bi’t-tav‘i’s-sâf ikrâr ve i‘tirâf edip karye-i mezbûrede vâki‘ bir tarafdan İstefan v. Dimitri mülkü ve bir tarafdan Trandafilo v. Dimitri mülkü ve bir tarafdan mîrî ahır ve bir tarafdan tarîk-i âm ile mahdûd olan mülk menzilimi ve bir kıt‘a bağ ve bir harman yerimi cümle tevâbi‘ ve levâhıkı ile bundan akdem mezbûr oğlum Aleksi’ye bin kıt‘a riyâlî guruş-ı kebîre bey‘ ve teslîm ol dahi iştirâ ve tesellüm eyledikden sonra karye-i mezbûrede mevâzi‘-i adîdede vâki‘ yirmi kıt‘a tarlalarımın hakk-ı tasarruflarını dahi sâhib-i arz ma‘rifetiyle oğlum mezbûr Aleksi’ye bin kıt‘a riyâlî guruş bedel mukābelesinde tefvîz ve ferağ ol dahi tefevvuz ve kabûl eyledikden sonra semen-i mezbûr ile bedel-i merkūm cem‘an iki bin guruşu âhara zimmetimde deynim olan iki bin kıt‘a riyâlî guruşu edâ ve teslîm etmek üzre oğlum mezbûru tarafımdan vekîl ol dahi vekâlet-i mezbûreyi kabûl etmişidi hâlen oğlum Aleksi iki bin guruş deynimi semen-i mezbûr ile edâ etmişdir ba‘de’l-yevm oğlum merkūm Aleksi zimmetinde menzil ve bağ ve tarlalar semen ve bedellerinden bir akçe ve bir habbe bâkī kalmadı oğlum mezbûr Aleksi’nin zimmetini ibrâ ve iskāt eyledim, min ba‘d menzil-i mahdûd-ı mezkûrda ve bağ-ı mezbûrda ve ol tarlalarda benim vechen mine’l-vücûhi’ş-şer‘iyye ve sebeben mine’l-esbâbi’l-mer‘iyye alâka ve medhalim yokdur dedikde mukırr-ı mezbûrun minvâl-i muharrer üzre câr[î] ve sâdır olan cemî‘ ikrârını merkūm Aleksi bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb ve imlâ olundu. [64b] Fi’l-yevmi’l-hâmis ve’l-ışrîn min Saferi’l-hayr li sene sittîn ve sittîn ve elf. Şuhûdü’l-hâl: Ali Beşe b. Ahmed, Mehmed Beşe b. Abdi, Kasım Beşe b. Mehmed, Kadri Çelebi b. ( ) el-Kasab, Ali Beşe b. Mustafa, Hüseyin Çelebi b. Ali, Bayram Sofu b. Mehmed, Abdi Beşe b. İskender ve gayr