Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 276 Hüküm no: 315 Orijinal metin no: [64b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Dimitri v. Kiryazi’nin mülk menzil yerini Mustafa Çelebi b. Ali’ye sattığı Havâss-ı refî‘a kazâsına tâbi‘ Ayastefanos nâm karye sâkinlerinden Dimitri v. Kiryazi nâm zimmî meclis-i şer‘-i şerîf-i lâzımü’t-tekrîmde işbu râfi‘ü’l-kitâb Mustafa Çelebi b. Ali nâm kimesne mahzarında bi tav‘ihî ikrâr ve i‘tirâf edip silk-i mülkümde münselik olup karye-i mezbûrede vâki‘ bir tarafdan Fotoki v. Aleksandra mülkü ve bir tarafdan mezbûr Mustafa Çelebi mülkü ve iki tarafdan tarîk-i âm ile mahdûd ve eşcâr-ı müsmire ve gayr-ı müsmireyi müştemil mülk menzil yerimi mezbûr Mustafa Çelebi’ye dört bin cedîd akçeye bey‘-i kat‘î ile bey‘ ve teslîm edip ol dahi vech-i meşrûh üzre iştirâ ve tesellüm ve kabz ve kabûl eyledikden sonra semen-i mârrü’z-zikri mezbûr Mustafa Çelebi yedinden tamâmen ahz ü kabz eyledim ba‘de’l-yevm zikr olunan menzil yeri mezbûr Mustafa Çelebi’nin mülk-i müşterâsıdır keyfemâ yeşâ ve hasbemâ yehtâr mutasarrıf olsun dedikde gıbbe’t-tasdîki’ş-şer‘iyyi’l-vicâhî mâ hüve’l-vâki‘ bi’l-ibtigā ketb olundu. Fi’l-yevmi’s-sâbi‘ ve’l-ışrîn min Saferi’l-hayr li sene sittîn ve sittîn ve elf. Şuhûdü’l-hâl: Yusuf Beşe b. Abdullah, Sinan b. Abdullah, Mustafa b. Abdullah, Süleyman b. Abdullah, Receb Efendi b. Abdi ve gayr