Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 276 Hüküm no: 316 Orijinal metin no: [64b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fotoki v. Aleksandra’nın mülk menzilini Mustafa Çelebi b. Ali’ye sattığı Havâss-ı refî‘a kazâsına tâbi‘ Ayastefanos demekle ma‘rûf karye sâkinlerinden olup Fotoki v. Aleksandra nâm zimmî meclis-i şer‘-i şerîf-i enverde işbu sâhibü’l-kitâb Mustafa Çelebi b. Ali nâm kimesne mahzarında tâyi‘an ikrâr ve i‘tirâf edip silk-i mülkümde münselik olup karye-i mezbûrede vâki‘ etrâf-ı erba‘adan Kasab Hırsoderki v. Kiryazi mülkü [ve] mezbûr Mustafa Çelebi mülkü ve tarîk-i âm ile mahdûd iki bâb tahtânî odaları ve müşterek su kuyusunu ve bahçeyi ve havluyu müştemil olan mülk menzilimi cümle tevâbi‘iyle mezbûr Mustafa Çelebi’ye altı bin cedîd akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ol dahi minvâl-i muharrer üzre iştirâ ve tesellüm ve kabz ve kabûl eyledikden sonra semeni olan meblağ-ı mezbûr altı bin akçeyi mezbûr Mustafa Çelebi yedinden tamâmen ahz ü kabz eyledim ba‘de’l-yevm menzil-i mezkûr mezbûr Mustafa Çelebi’nin mülk-i müşterâsıdır keyfemâ yeşâ ve hasbemâ yehtâr mutasarrıf olsun dedikde gıbbe’t-tasdîki’ş-şer‘î mâ hüve’l-vâki‘ bi’l-ibtigā ketb olundu. Fi’l-yevmi’s-sâbi‘ ve’l-ışrîn min Saferi’l-hayr li sene sittîn ve sittîn ve elf. Şuhûdü’l-hâl: Yusuf Beşe b. Abdullah, Sinan b. Abdullah, el-Hâc Mustafa Beşe, Süleyman b. Abdullah