Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 277 Hüküm no: 317 Orijinal metin no: [64b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı Ali b. İslâm’ın ekmekçilik yapan ortağı Yorgi ile ortaklığı fesh edip hesaplaşmaları Habbâz tâ’ifesinden işbu râfi‘ü’l-kitâb el-Hâc Ali b. İslâm meclis-i şer‘-i şerîfde şerîki Yorgi v. Foti nâm zimmî muvâcehesinde üzerine da‘vâ ve takrîr-i kelâm edip mukaddemâ mezbûr Yorgi ile akd-i şirket eylediğimde yedine doksan iki bin akçe sermâye teslîm ol dahi vech-i muharrer üzre kabz ve tesellüm etmişidi hâlen fesh-i şirket edip ol teslîm eylediğim sermâyeyi hesâb ve kitâb eylediğimizde altmış altı bin akçeyi bana teslîm edip meblağ-ı bâkī yirmi altı bin akçe hakkım zimmetinde kalmışdır suâl olunup teslîme tenbîh olunmak matlûbumdur dedikde gıbbe’s-suâl mersûm Yorgi cevâbında fi’l-hakīka müdde‘î-i mezbûr ile mukaddemâ şerîkler olduğumuzda vech-i mübeyyen üzre doksan iki bin cedîd akçe teslîm ben dahi kabz etmişidim [65a] hâlen fesh-i şirket edip hesâb ve kitâb eylediğimizde altmış altı bin akçesi teslîm ben dahi mevcûd olmağla yedine teslîm eylediğimden sonra meblağ-ı bâkī yirmi altı bin akçe hâlen mezbûr el-Hâc Ali’ye zimmetimde lâzımü’l-kazâ deynimdir deyû bi tav‘ihî mukır ve mu‘terif olmağın ikrâr mûcebince meblağ-ı bâkī yirmi altı bin akçeyi müdde‘î-i mezbûr el-Hâc Ali’ye tamâmen def‘ ve teslîme merkūm Yorgi’ye tenbîh olunup mâ hüve’l-vâki‘ bi’t-taleb ketb olundu. Fî evâhiri Saferi’l-hayr li sene sittîn ve sittîn ve elf. Şuhûdü’l-hâl: Hasan Beşe b. Ali, Mustafa Beşe b. Ali, Ali Beşe b. Mustafa, Ahmed Beşe b. Mehmed, Hüseyin Çelebi b. Ali, Yani v. Nikola, Yorgo v. Mano[l], Hıristo v. Yorgi, Dimo v. Kika ve gayr