Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 277 Hüküm no: 318 Orijinal metin no: [65a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Dimetoka metrepolidi Danyal v. Kanakoz’un Kostantin v. Hıristo’ya emânet verdiği para ve eşyasının vârisince teslim alındığı Fi’l-asl cezîre-i Midilli kasabası sâkinlerinden olup bundan akdem mahrûse-i Edirne’de Hıristor mahallesi sâkinlerinden olduğu hâlde hâlik olan Dimetoka keferesi metrepolidi olan Danyal v. Kanakoz nâm zimmînin li ebeveyn er karındaşı oğlu ve hasran vârisi Yorgaki v. Rali nâm zimmî meclis-i şer‘-i şerîfde işbu râfi‘ü’s-sifr Kostantin v. Hıristo nâm zimmî muvâcehesinde tav‘an ikrâr-ı tâm ve i‘tirâf edip hâlik-i mezbûr hâl-i hayâtında mersûm Kostantin yedine doksan bin akçe ile beynimizde ma‘lûm esvâbını alâ tarîki’l-vedî‘a vaz‘ ve teslîm, mezbûr Kostantin dahi vech-i muharrer üzre kabz ve tesellüm edip meblağ-ı mezbûr ile ma‘lûmü’l-mikdâr esvâbını kable’l-ahz mürd olmağla meblağ-ı mezbûru ve beynimizde ma‘lûm olan esvâb şer‘le bana intikāl etmişidi, hâlen meblağ-ı mezbûru ve ol beynimizde ma‘lûm olan esvâb-ı muvedda‘-ı merkūm Kostantin yedinden tamâmen ahz ü kabz eyledim ba‘de’l-yevm merkūm Kostantin zimmetinde bir akçe ve bir habbe bâkī kalmadı merkūm Kostantin[’in] zimmetini ibrâ-i âmm-ı kātı‘ü’n-nizâ‘ ile ibrâ ve iskāt eyledim min ba‘d da‘vâ ve nizâ‘ım yokdur sudûr dahi ederse inde’l-hükkâmi’l-kirâm istimâ‘ olunmaya dedikde mukırr-ı merkūmun minvâl-i mübeyyen üzre cârî ola[n] ikrârını merkūm Kostantin bi’l-muvâcehe tasdîk edicek mâ hüve’l-vâki‘ bi’t-taleb ketb olundu. Fi’l-yevmi’t-tâsi‘ ve’l-ışrîn min Saferi’l-hayr li sene sittîn ve sittîn ve elf. Şuhûdü’l-hâl: Mehmed Ağa b. Hasan el-Cündî, el-Hâc Mahmud b. Hüseyin, Ali Bey b. Ömer el-Cündî, Hüseyin Bey b. Mahmud el-Cündî, Nikosos v. Kostantin, Goryel v. İstat, Yanaki v. Kiryaki