Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 278 Hüküm no: 319 Orijinal metin no: [65a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kostantin v. Hıristo’nun Papa Petro v. Niko’nun borcuna kefil olan Yorgaki’yi elinde rehin olduğu için kefâletten çıkardığı Mahrûse-i Edirne Ayayani mahallesinde Papa Kasanos nâm mevzi‘de sâkin Kostantin v. Hıristo nâm zimmî meclis-i şer‘-i şerîf-i lâzımü’t-teşrîfde işbu râfi‘ü’s-sifr Yorgaki v. Rali nâm zimmî muvâcehesinde bi’t-tav‘ ve’l-ihtiyâr lâ-bi’l-kerh ve’l-icbâr ikrâr ve i‘tirâf edip gāib ani’l-meclis Papa Petro v. Niko nâm râhib[de] cihet-i deyn-i şer‘îden üç [bin] yedi yüz on bir riyâlî guruş ile otuz akçe hakkım olup meblağ-ı mezbûra merkūm Yorgaki mukaddemâ kefîl bi’l-mâl olmuş idi, lâkin medyûn-ı merkūmun deyn-i mezbûra vefâ eder yedimde rehn-i makbûzu olmağın mersûm Yorgaki’yi kefâlet-i mezbûreden ihrâc edip zimmetini husûs-ı mezbûra mü[te]‘allik âmme-i de‘âvîden ibrâ ve iskāt eyledim ba‘de’l-yevm merkūm Yorgaki ile kefâlet-i merkūmeye ve gayrı husûsa müte‘allik vechen mine’l-vücûhi’ş-şer‘iyye da‘vâ ve nizâ‘ım yokdur, sudûr dahi ederse lede’l-hükkâmi’l-kirâm istimâ‘ olunmasın dedikde gıbbe’t-tasdîki’ş-şer‘î mâ hüve’l-vâki‘ bi’l-ibtigā ketb olundu. Fi’l-yevmi’l-âhir min Saferi’l-hayr li sene sittîn ve sittîn ve elf. Şuhûdü’l-hâl: Mehmed Ağa b. Hasan el-Cündî, el-Hâc Mahmud Ağa b. Hüseyin el-Cündî, Ali Bey b. Ömer el-Cündî, Hüseyin Bey Abdi el-Cündî