Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 278 Hüküm no: 320 Orijinal metin no: [66b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İbrahim Bey b. Hamza’nın vârislerine intikal eden menzilin vârisler arasında ifrâz ve taksîm edildiği Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de Davud Ağa mahallesi sâkinlerinden olup bundan akdem vefât eden İbrahim Bey b. Hamza nâm müteveffânın verâseti sulbiye kebîre kızları Âişe ve Sâime nâm hâtunlar ile li ebeveyn er karındaşı oğlu Ali Beşe b. Mehmed[’e] münhasıra olduğu şer‘an zâhir ve müte‘ayyin oldukdan sonra husûs-ı âti’z-zikre mezbûr Ali Beşe kendi tarafından asâleten ve zevcesi merkūme Âişe’nin vekîli olup mezbûreyi ma‘rifet-i şer‘iyye ile ârifân olan Ahmed Beşe b. Mehmed ve Ebûbekir Dede b. Hasan şehâdetleriyle şer‘an vekâleti sâbite oldukdan sonra vekâleten meclis-i şer‘-i şerîf-i enverde işbu râfi‘atü’l-kitâb mezbûre Sâime’nin zevci ve tarafından husûs-ı câ’i’z-zikre vekîli olup mezbûrenin zâtını ma‘rifet-i şer‘iyye ile ârifân olan Mehmed Efendi b. Ramazan ve Mustafa Çelebi b. Mehmed şehâdetleriyle şer‘an vekâleti sâbite olan Mustafa Çelebi b. Ali mahzarında bi’l-asâle ve bi’l-vekâle ikrâr ve i‘tirâf edip müteveffâ-yı mezbûrun [muhallefâtından olup] mahalle-i mezbûrede vâki‘ bir tarafı merhûm Davud Ağa Vakfı olan odalar ve bir tarafı Cafer Beşe b. Abdullah mülkü ve iki tarafı tarîk-i âm ile mahdûd olup üç bâb fevkānî odaları ve ahırı ve eşcâr-ı müsmire ve gayr-ı müsmire hadîkayı ve kenîfi müştemil olan menzil bundan akdem beynimizde kısmet eylediğimizde menzil-i mezbûrun garb tarafından vâki‘ iki bâb fevkānî oda ve ahır ve dehliz ve bahçeden tûlen kırk beş ve arzan yedi bi hesâb-ı satrancî üç yüz on beş zirâ‘ arsa ile ifrâz ve müvekkile-i merkūme Sâime’nin hissesine ta‘yîn olunup ve şark tarafından vâki‘ sokak kapısı ile bir bâb fevkānî oda ve şehnişîn ve bir sofa ve bir odunluk ve sâir bâkī kalan bahçe ve su kuyusu müşterek olmak üzre benim müvekkilem mezbûrenin hissemize ta‘yîn olunup bundan akdem beynimizde ifrâz ve her birimiz vech-i muharrer üzre hisse-i ma‘lûmelerini kabz ve kabûl ve alâmet-i fâsıla vaz‘ eyledik ba‘de’l-yevm birbirimiz ile menzil-i mahdûd-ı mezkûrdan hissemize müte‘allik da‘vâ ve nizâ‘ımız yokdur dedikde gıbbe’t-tasdîki’ş-şer‘î mâ hüve’l-vâki‘ bi’l-ibtigā ketb olundu. Fi’l-yevmi’s-sâdis aşer min Zilka‘deti’ş-şerîfe li sene hamsin ve sittîn ve elf. Şuhûdü’l-hâl: eş-Şeyh Mehmed Efendi b. Ramazan, Budak Beşe b. Kābil, Mustafa Beşe b. Mehmed, Ali Beşe b. Himmet, Mehmed Efendi b. Hürrem Sah [Derkenâr] Sehv olunmağla derkenâr olunmuşdur.