Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 279 Hüküm no: 321 Orijinal metin no: [66b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İbrahim Bey b. Hamza’nın vârislerine intikal eden menzilin vârisler arasında ifrâz ve taksîm edildiği Medîne-i Hazret-i Ebâ Eyyûb el-Ensârî mahallâtından Davud Ağa mahallesi sâkinlerinden olup bundan akdem vefât eden İbrahim Bey b. Hamza nâm müteveffânın verâseti sulbiye kebîre kızları Sâime ve Âişe nâm hâtunlar ile li ebeveyn er karındaşı oğlu Ali Beşe b. Mehmed’e münhasıra olduğu şer‘an zâhir ve müte‘ayyin oldukdan sonra mezbûre Sâime’nin zevci ve tarafından husûs-ı âti’z-zikre vekîli olup merkūmenin zâtını ma‘rifet-i şer‘iyye ile ârifân olan Mehmed Efendi [b.] Ramazan ve Mustafa Çelebi b. Mehmed şehâdetleri ile şer‘an vekâleti sâbite olan Mustafa Çelebi b. Ali meclis-i şer‘-i şerîf-i ezherde işbu râfi‘ü’l-kitâb mezbûr Ali Beşe kendi tarafından asâleten ve zevcesi merkūme Âişe tarafından vekîli olup mezbûrenin zâtını ma‘rifet-i şer‘iyye ile ârifân olan Ahmed Beşe b. Mehmed ve Ebûbekir Dede b. Hasan şehâdetleri ile şer‘an vekâleti sâbite oldukdan sonra vekâleten muvâcehesinde bi’l-vekâle ikrâr edip müteveffâ-yı mezbûrun muhallefâtından olup mahalle-i mezbûrede vâki‘ bir tarafdan mezkûr Davud Ağa Vakfı ve bir tarafdan Cafer Beşe b. Abdullah mülkü ve iki tarafdan tarîk-i âm ile mahdûd üç bâb fevkānî odaları ve ahırı ve eşcâr-ı müsmire ve gayr-ı müsmire hadîkayı ve bir su kuyusunu ve kenîfi müştemil menzil bundan akdem beynimizde rızâlarımız ile kısmet olundukda menzil-i mezbûrun şark tarafında vâki‘ sokak kapısı ile bir bâb fevkānî odası şehnişîni ve bir sofa ve bir odunluk ve bahçe ve müşterek su kuyusu mezbûr Ali Beşe ile zevcesi müvekkile-i merkūme Âişe’nin hisselerine ta‘yîn olup bundan akdem her birimiz vech-i meşrûh üzre hisse-i ma‘lûmeleri kabz ve kabûl ve alâmet-i fâsıla vaz‘ eyledik ba‘de’l-yevm biribirimiz ile menzil-i mahdûd-ı mezkûrdan hissemize müte‘allik da‘vâ ve nizâ‘ımız yokdur dedi dedikde gıbbe’t-tasdîki’ş-şer‘î mâ hüve’l-vâki‘ bi’l-ibtigā ketb olundu. Fi’l-yevmi’s-sâdis aşer min Zilka‘deti’ş-şerîfe li sene hamsin ve sittîn ve elf. Şuhûdü’l-hâl: eş-Şeyh Mehmed Efendi b. Ramazan, Budak Beşe b. Kābil, Mustafa Beşe b. Mehmed, Ali Çelebi b. Himmet, Mehmed Efendi b. Hürrem