Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 280 Hüküm no: 322 Orijinal metin no: [66a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mîrî hizmetle mükellef olan köy ahâlîsinin hizmetlerini gerektiği şekilde yapmadığından Subaşı Ali Bey’in talebi ile herkesin yapacağı işin belirlendiği ve hizmetlerini yerine getirmeye söz verdikleri Havâss-ı Kostantıniyye kazâsına tâbi‘ İstefanos nâm karye subaşısı ve kāsıl emîni olan işbu râfi‘ü’l-kitâb Ali Bey b. Mustafa nâm kimesne meclis-i şer‘-i şerîf-i lâzımü’t-teşrîfde karye-i merkūme ahâlîsinden İstefan v. Rali ve Londari? v. İstefan ve Ramondi v. Dimitri ve Yani v. Kosta ve Dimitri v. Kiryazi ve Pelaş v. Dimitri ve Papa Velisar v. İstefan ve İstefan v. Maklari ve Yanaki v. Aleksi ve Dimitri v. Manol ve Ramondi v. Arslan ve Mihal v. Manol ve Mihal v. Kosta ve Hıristofyos v. Paskal ve Kostantin v. Manol ve Diyamandi v. Manol ve Yamandi v. Manol ve Aleksandri v. Anderyaş nâm zimmîler muvâcehelerinde takrîr-i kelâm ve ifâde-i merâm edip karye-i mezbûre ahâlîsi Istabl-ı Âmire re[‘â]yâsı olmağla ahâlî-i merkūmenin kimi mîrî için kāsıl ekip ve kimi mîrî otlak yığın yığıp ve kimi mîrî çayır handeki kesip ve kimi dahi mîr[î] tophânede top döküldükde top kalıbı için balçık çıkarıp kadîmü’l-eyyâmdan bu minvâl üzre hizmet ederler idi, lâkin ahâlî-i karye-i mezbûreden ba‘zı hizmetinde tekâsül etmekle hizmetleri hâlî ve mu‘attal kaldığı ecilden ba‘de’l-yevm mezbûrûn zimmîler on beş çift çıkarıp defterde mastûr olduğu üzre kāsıl ekmeğe ta‘ahhüd eylediklerinden sonra karye-i mezbûre ahâlîsinden Diyaflu v. Yorgi ve Çemandan v. Nikite ve Yamandi v. Laskari ve Duka v. Kalvirepzi ve Yorgo v. Kosta ve Aleksi v. Kalandine ve Pelaş v. Aleksi ve Nikola v. Yabancı ve Todori v. Hıristo ve Neskos v. ( ) ve Dimitri v. Pandazi ve Yani v. Kosta ve Yorgo v. Nikola ve Harsoveli v. Mavridi ve Nikola v. Risova v. Niko ve Marito v. Tanaş ve Dimitri v. Karasil nâm zimmîler dahi ba‘de’l-yevm mîrî otlak yığını vâki‘ oldukda yığıp ve handek lâzım geldikde kesip ve top için balçık lâzım gelirse çıkarmak üzre her biri müte‘ahhid olup eğer bu hizmetler vâki‘ olmaz ise mîrî kāsıl ekenlere her birileri tahammülüne göre imdâd etmeye dahi kavl-i karâr etmişlerdir suâl olunsun dedikde gıbbe’s-suâl merkūmûn zimmîler cevâblarında fi’l-hakīka müşârun-ileyh Ali Bey’in takrîr-i meşrûhu üzre beynimizde kavl ve ta‘ahhüd eyledik deyû her biri müşârun-ileyh Ali Bey’in ke[li]mât-ı mahkiyesini tasdîk eylediklerinde vâki‘ü’l-hâl bi’l-ibtigā ketb olundu. Fi’l-yevmi’s-selh min Saferi’l-hayr li sene sittîn ve sittîn ve elf. Şuhûdü’l-hâl: Ahmed Çelebi b. Mehmed Efendi, Mehmed Beşe b. Mahmud, Ali Beşe b. Mustafa, Hüseyin Beşe b. Ali, Mustafa Beşe b. Mehmed