Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 281 Hüküm no: 323 Orijinal metin no: [66a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Türbe hamamının kira süresi dolup hamamı işleten Mehmed Çelebi b. Ömer’in kirayı arttırarak yeniden kiraladığı Husûs-ı câ’i’z-zikrin mahallinde istimâ‘ olunması için buyruldu-yı şerîf vârid olmağın imtisâlen leh bu fakīr zeyl-i kitâbda mastûretü’l-esâmî bî-garaz müslimîn ile medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de türbe-i şerîfe kurbunda câmi‘-i şerîfde akd-i meclis-i şer‘-i şerîf olundukda yine Câmi‘ mahallesi sâkinlerinden Ali Çelebi b. Abdullah yine meclis-i ma‘kūd-ı mezkûrda işbu râfi‘ü’l-kitâbi’l-müstetâb Mehmed Çelebi b. Ömer nâm kimesne muvâcehesinde üzerine da‘vâ ve takrîr-i kelâm edip mezbûr Mehmed Çelebi medîne-i mezbûrede vâki‘ türbe? hamamcısı olup hâlen senesi tamâm olmağla hamam-ı mezbûr hazret-i müşârun-ileyh vakfından olmağın vakıf mütevellîsi bana beher sene yetmiş bin akçe ücret ile îcâr edip temessük vermişdir, eğer ücret-i mezbûre ile merkūm Mehmed Çelebi kabûl ederse emr şer‘-i şerîfindir deyû yedinde olan temessükü ibrâz ve feth ve kırâ’at olundukda mazmûn-ı temessük-i mezbûr takrîr-i meşrûhuna muvâfık bulundu[kda]n sonra mezbûr Mehmed Çelebi istintâk olundukda hâlen hamam-ı mezbûr sene[de] altmış beş bin akçe ücret ile taht-ı icâremde idi lâkin işbu gün tamâm olup yetmiş [bin] akçe ücret ile kabûl ederin deyû mezbûr Mehmed Çelebi kabûl eylediğinden gayrı a‘yân-ı vilâyetden cemm-i gafîr meclis-i ma‘kūd-ı mezkûra hâzırûn olup mezbûr Mehmed Çelebi dindâr ve müstakīm ve fazîletli kimesne ve cânib-i vakf-ı şerîfe her vechile nâfi‘ kimesnedir deyip mezbûr Mehmed Çelebi’nin üzerinde karâr ederiz etmeğin mâ hüve’l-vâki‘ bi’l-ibtigā ketb olundu. Fî gurreti şehri Rebî‘ulevvel sene [10]69. Şuhûdü’l-hâl: Ahmed Ağa b. Ali, Mehmed Efendi b. Ahmed, Mehmed Ağa b. Abdülbâkī, İsmail Efendi b. Hasan, Ahmed b. Mehmed, Şaban Bey b. Ali