Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 282 Hüküm no: 324 Orijinal metin no: [66a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mühtedî Hasan Beşe b. Abdullah’ın zevcesi Zagrobi’den boşandığı Fi’l-asl vilâyet-i Rumeli’nde Yenişehir kazâsına tâbi‘ Fenar nâhiyesi muzâfâtından Ayayorgi demekle ma‘rûfe karye sâkinlerinden olup bundan akdem şeref-i İslâm ile müşerref olan Hasan Beşe b. Abdullah nâm mühtedî mahfil-i kazâda işbu râfi‘-i vesîka Zagrobi nâm nasrâniyenin baba tarafından husûs-ı câ’i’z-zikre sâbitü’l-vekâle vekîl-i şer‘îsi olan Hayyât Dimo v. ( ) nâm zimmî muvâcehesinde bi’t-tav‘ ve’l-ihtiyâr ikrâr-ı [66b] tâm ve takrîr-i kelâm edip mezbûr Zagrobi zevcem olup hüsn-i mu‘âşeretimiz olmamağla talâk-ı bâ’in ile tatlîk edip zevciyete müte‘allik cemî‘ da‘vâdan zimmetini ibrâ ve iskāt eyledim dedikde mukırr-ı mezbûrun ikrâr-ı meşrûhunu vekîl-i merkūm Hayyât Dimo bi’l-muvâcehe tasdîk etmeğin mâ hüve’l-vâki‘ bi’l-ibtigā ketb olundu. Fî gurreti şehri Rebî‘ulevvel li sene sittîn ve sittîn ve elf. Şuhûdü’l-hâl: Receb Efendi b. Abdi, İbrahim Beşe b. Abdullah, Zülfikar Beşe b. Mustafa, Abdi Beşe b. İskender