Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 282 Hüküm no: 325 Orijinal metin no: [66b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Beşe b. Hüseyin’in mülk menzilini sekiz sene önce Mahmud Beşe b. Hasan’a sattığı ve bedelini tahsil ettiği Medîne-i Hazret-i Ebâ Eyyûb el-Ensârî -razıye anhü rabbühü’l-Melikü’l-Bârî-de merhûm Davud Ağa mahallesi sâkinlerinden Hasan Beşe b. Hüseyin nâm kimesne meclis-i şer‘-i şerîfde işbu râfi‘ü’l-kitâb Mahmud Beşe b. Hasan nâm kimesne tarafından tasdîk-i câ’i’z-zikre vekîl olup bimâ hüve tarîkü’s-sübût şer‘an vekâlet-i sâbite olan Mustafa Çelebi b. Abdülbâkī nâm vekîl mahzarında bi’t-tav‘i’s-sâf ikrâr ve i‘tirâf edip mahalle-i mezbûrede vâki‘ bir tarafdan mekābir-i müslimîn ve bir tarafdan yine benim âhar mülküm olan menzil ve bir tarafdan Âişe Hâtun bt. Mahmud mülkü ve bir tarafdan tarîk-i âm ile mahdûd olup üç bâb fevkānî ve bir bâb tahtânî odaları ve bir ahırı ve bir su kuyusu ve zât-ı eşcâr-ı müsmire ve gayr-ı müsmire hadîkayı ve kenîfi müştemil olan mülk menzilimi cümle tevâbi‘ ve levâhıkı ile müvekkil-i mezbûr Mahmud Beşe târih-i kitâbdan sekiz sene mukaddem yirmi üç bin cedîd akçeye tarafeynden îcâb ve kabûlü hâvî bey‘-i kat‘î ile bâtten bey‘ ve teslîm ol dahi iştirâ ve tesellüm ve kabûl ve kabz eyledikden sonra semen-i mezbûr yirmi üç bin cedîd akçeyi târih-i kitâbdan sekiz sene mukaddem müvekkil-i mezbûr Mahmud Beşe yedinden bi’t-tamâm ve’l-kemâl ahz ü kabz etmişidim, hâlen menzil-i mahdûd-ı mezkûr müvekkil-i merkūm Mahmud Beşe’nin mülk-i müşterâsıdır keyfemâ yeşâ ve hasbemâ yehtâr mutasarrıf olsun dedikde mukırr-ı mezbûr Hasan Beşe’nin minvâl-i meşrûh üzre cârî ve sâdır olan cemî‘ ikrârını mezbûr Mustafa Çelebi vekâleti hasebiyle bi’l-muvâcehe tasdîk ve bi’l-müşâfehe tahkīk etmeğin mâ hüve’l-vâki‘ bi’l-ibtigā ketb olundu. Fî gurreti Rebî‘ulevvel sene sittîn ve sittîn ve elf. Şuhûdü’l-hâl: Muharrirü’l-kaziyye Mustafa Efendi b. Merhûm Hasan Efendi, Mehmed Efendi b. Merhûm Nasuh Çavuş, Şeyhî Mehmed Efendi b. Ramazan, Muslu Çelebi b. Mehmed, Mustafa Çelebi b. Mehmed, Ali Beşe b. Mustafa, Mehmed Ağa b. Mustafa, Hüseyin Beşe b. Mustafa