Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 283 Hüküm no: 326 Orijinal metin no: [66b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mahmud Beşe b. Hasan’ın mülk menzilini Mustafa Çavuş Vakfı’na bey‘ bi’l-istiğlâl yoluyla sattığı Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de merhûm Davud Ağa mahallesi sâkinlerinden Mahmud Beşe b. Hasan tarafından husûs-ı câ’i’z-zikri ikrâra vekîl olup Mustafa Çelebi b. Mehmed ve Şeyh Mehmed Efendi b. Ramazan şehâdetleri ile şer‘an vekâleti sâbite olan Mustafa Çelebi b. Abdülbâkī meclis-i şer‘-i şerîf-i lâzımü’t-teşrîfde medîne-i mezbûrede merhûm Mustafa Çavuş Vakfı’na kāimmakām-ı mütevellî olan umdet-i erbâbü’t-tahrîr ve’l-kalem Mustafa Efendi b. ‘İz mahzarında bi’l-vekâle ikrâr ve i‘tirâf edip müvekkil-i mezbûr Mahmud Beşe’nin silk-i mülk-i sahîhinde münselik olup mahalle-i mezbûrede vâki‘ bir tarafdan mekābir-i müslimîn ve bir tarafdan Hasan Beşe b. Hüseyin mülkü ve bir tarafdan Âişe Hâtun bt. Mahmud mülkü ve bir tarafdan tarîk-i âm ile mahdûd olan mülk menzilimi müşârun-ileyh Mustafa Efendi’ye bi tarîki’l-istiğlâl seksen yedi buçuk kıt‘a riyâlî guruş-ı kebîre bey‘ ve teslîm ol dahi ber minvâl-i meşrûh mâl-ı vakf-ı mezbûr ile iştirâ ve tesellüm? ve kabûl ve kabz eyleyip semeni olan meblağ-ı mezbûr seksen yedi buçuk mezbûru’n-na‘t guruşu merkūm Mustafa Efendi yedinden tamâmen ahz ü kabz eylediğimden sonra yine menzil-i mahdûd-ı mezkûru müşârun-ileyh Mustafa Efendi bin altmış beş senesi Şevvâlü’l-mükerremi gurresinden her senede on ikişer buçuk guruş ile otuz akçe ücretden üç sene tamâmına değin otuz yedi buçuk riyâlî guruş ile doksan cedîd akçe icâre ile bana îcâr ve teslîm eyledikde ben dahi minvâl-i meşrûh üzre menzil-i mahdûd-ı mezkûru istîcâr ve tesellüm ve kabz ve kabûl eyledim dedi dedikde vekîl-i mezbûr Mustafa Çelebi’nin minvâl-i mübeyyen üzre cârî ve sâdır olan cemî‘ ikrâr ve i‘tirâfını kāimmakām-ı mütevellî olan müşârun-ileyh Mustafa bi’l-muvâcehe tasdîk ve bi’l-müşâfehe tahkīk etmeğin mâ hüve’l-vâki‘ bi’l-ibtigā ketb olundu. Fî gurreti şehri Rebî‘ulevvel min şuhûri sene sittîn ve sittîn ve elf. Şuhûdü’l-hâl: Umdetü’l-müderrisîn Ahmed Efendi b. Mehmed el-mu‘abbir, umdetü kuzâti’l-İ[slâ]m Mehmed Efendi b. el-merhûm Nasuh Ağa, muharrirü’l-kaziyye Mustafa Efendi b. Hasan el-Müderris, Şeyh Mehmed Efendi b. Ramazan, Mustafa Çelebi b. Mehmed, Mehmed Ağa b. Mustafa, Ali Beşe b. Mustafa, Hüseyin Beşe b. Ali