Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 284 Hüküm no: 327 Orijinal metin no: [67a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Beşe b. Mehmed ile zevcesi Âişe bt. İbrahim’in mülk menzillerini Mustafa Çavuş Vakfı’na bey‘ bi’l-istiğlâl yoluyla sattıkları Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de Davud Ağa mahallesi sâkinlerinden Ali Beşe b. Mehmed kendi tarafından asâleten ve zevcesi Âişe bt. İbrahim nâm hâtun tarafından husûs-ı âti’z-zikre vekîl olup mezbûrenin zâtını ma‘rifet-i şer‘iyye ile ârifân olan Ahmed Beşe b. Mehmed ve Ebûbekir Dede b. Hasan şehâdetleriyle şer‘an vekâleti sâbite oldukdan sonra vekâleten meclis-i şer‘-i şerîf-i enverde medîne-i mezbûrede vâki‘ merhûm Mustafa Çavuş Vakfı’na mütevellî olan işbu hâmilü’l-kitâb Mehmed Efendi b. Hasan mahzarında bi’l-asâle ve bi’l-vekâle ikrâr ve i‘tirâf edip silk-i mülkümüzde münselik olup mahalle-i mezbûrede vâki‘ bir tarafdan mezkûr Davud Ağa Vakfı olan odaları ve bir tarafdan Nâime Hâtun mülkü ve bir tarafdan Cafer Beşe b. Abdullah mülkü ve bir tarafdan tarîk-i âm ile mahdûd ve mümtâz mülk menzilimizi cümle tevâbi‘iyle mütevellî-i mezbûr Mehmed Efendi’ye bi tarîki’l-istiğlâl yüz elli kıt‘a riyâlî kebîr guruşa bey‘ ve teslîm ol dahi mâl-ı vakf-ı mezbûr ile vech-i muharrer üzre iştirâ ve tesellüm ve kabûl eyleyip semeni olan mârrü’z-zikr yüz elli guruşu mütevellî-i mezbûr yedinden tamâmen ahz ü kabz eylediğimizden sonra yine mütevellî-i mezbûr menzil-i mahdûd-ı mezkûru ba‘de’t-tahliyeti’ş-şer‘iyye târih-i kitâb şehri gurresinden beher sene bin sekiz yüz akçeden üç sene tamâmına değin beş bin dört yüz akçe icâre ile bize îcâr ve teslîm biz dahi minvâl-i muharrer üzre istîcâr ve tesellüm ve kabûl eyledik dedikde gıbbe’t-tasdîki’ş-şer‘iyyi’l-vicâhî mâ hüve’l-vâki‘ bi’l-ibtigā ketb olundu. Fi’l-yevmi’l-ışrîn min Zilka‘deti’ş-şerîfe li sene hamsin ve sittîn ve elf. Şuhûdü’l-hâl: eş-Şeyh Mehmed Efendi b. Ramazan, Budak Beşe b. Kābil, Mustafa Beşe b. Mehmed, Ali Beşe b. Himmet, Mehmed Efendi b. Hürrem