Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 285 Hüküm no: 328 Orijinal metin no: [67a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Aleksandri v. Mihal’in dört yıllık kira borcunu ödediği ve borcu kalmadığını ikrar ettiği halde Ali Beşe’nin alacak iddiasında bulunduğu, ispat edemediği için men edildiği Havâss-ı Kostantıniyye -hamâha’llâhu te‘âlâ ani’l-beliyye- kazâsına tâbi‘ Çatalca nâhiyesi kasabası sâkinlerinden işbu râfi‘-i hâze’s-sifr Aleksandri v. Mihal nâm zimmî meclis-i şer‘-i şerîf-i lâzımü’t-teşrîfde yine nâhiye-i mezbûre kasabası sükkânından Ali Beşe b. Mehmed nâm kimesne mahzarında üzerine da‘vâ ve takrîr-i kelâm edip mezbûr Ali Beşe’nin kasaba-i mezbûr[e]de vâki‘ lede’l-cîrân ma‘lûmü’l-hudûd bir kıt‘a mülk bakkal dükkânı olup mukaddemâ mezbûr Ali Beşe dükkân-ı merkūm[u] senede dörder bin akçe ücretden dört senede on altı bin akçe icâre ile bana îcâr ve teslîm ben dahi istîcâr ve tesellüm edip sinîn-i merkūme tamâm olup fesh-i icâre eylediğimizde icâre-i mezbûrenin üç bin akçesini bir def‘a ve on üç bin akçesini bir def‘a ki cem‘an on altı bin akçeyi mezbûr Ali Beşe [ye]dine huzûr-ı müslimînde tamâmen def‘ ve teslîm edip ol dahi kabz ve tesellüm eyleyip zimmetimi ibrâ ve iskāt etmişiken hâlen şirrete sülûk edip benimle nizâ‘dan hâlî değildir, suâl olunup men‘ olunmak matlûbumdur dedikde gıbbe’s-suâl mezbûr Ali Beşe cevâbında fi’l-hakīka vech-i meşrûh üzre cihet-i icâreden on altı bin akçe hakkım olmağla bir def‘a üç bin akçeyi mezbûr Aleksandri yedinden kabz edip ve bâkī on üç bin akçeyi dahi kabz eyledim deyû huzûr-ı müslimînde bi tav‘in sâf ikrâr ve i‘tirâf etmişidim lâkin ikrâr-ı mezbûrumda kâzib olmağla meblağ-ı mezbûr on bin akçeyi taleb ederin deyicek bu husûsda mukır ikrârında kâzib olmadığına mukarrun leh mezbûr Aleksandri’ye yemîn lâzım gelmeğin yemîn arz olundukda mezbûr Ali Beşe vech-i muharrer üzre olan ikrârında kâzib olmadığına merkūm Aleksandri half billâhi’llezî enzele’l-İncîle alâ İsâ -aleyhi’s-selâm- etmeğin mûcebiyle mezbûr Ali Beşe bî-vech mu‘ârazadan men‘ ve def‘ olunup mâ hüve’l-vâki‘ bi’l-ibtigā ketb olundu. Fî evâhiri Saferi’l-hayr sene [10]66. Şuhûdü’l-hâl: Mustafa Ağa b. Çavuşzâde, İbrahim Ağa b. Ayas, el-Hâc Mahmud Beşe b. Hüdâverdi, Ali Beşe b. Mustafa, Hüseyin Beşe b. Ali, Hasan Beşe b. Mehmed