Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 286 Hüküm no: 330 Orijinal metin no: [67b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma Hâtun bt. Memi’nin bakımını üstlendiği torunu için babası Ali Beşe b. Mehmed’den nafaka alacaklarını talep ettiği ve sulh oldukları Medîne-i Hazret-i Ebâ Eyyûb el-Ensârî -dâme fî rıdvân- mahallâtından merhûm Kiremitçi Süleyman mahallesi sâkinlerinden râfi‘atü hâzihi’l-vesîka Fâtıma Hâtun bt. Memi meclis-i şer‘-i şerîf-i lâzımü’t-[te]şrîfde bundan akdem sadriye kızının zevci olan Ali Beşe b. Mehmed nâm kimesne muvâcehesinde üzerine da‘vâ ve takrîr-i kelâm edip mezbûr Ali Beşe’nin kendi firâşından hâsıl olan Ahmed nâm sagīr hâlen benim hacr ve terbiyemde olup sagīr-i mezbûrun nafaka-i mefrûzasından târih-i kitâba gelince ba‘de küllî hesâb bin dokuz yüz cedîd akçe nafaka olup meblağ-ı mezbûru bundan akdem mezbûr Ali Beşe’den taleb ve da‘vâ edip ol dahi edâdan imtinâ‘ etmekle beynimizde münâza‘ât-ı kesîre ve muhâsamât-ı şedîde cereyân etmişidi, el-hâletü hâzihî vesâtat-i muslihîn ile nafaka-i merkūmeden beni bin akçe üzerine sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mezbûr bin akçeyi mersûm Ali Beşe yedinden bi’t-tamâm ve’l-kemâl ahz ü kabz eyledim, târih-i kitâba gelince mezbûr Ali Beşe zimmetinde bir akçe ve bir habbe nafaka bâkī kalmadı zimmetini ibrâ ve iskāt eyledim dedikde gıbbe’t-tasdîki’ş-şer‘iyyi’l-vicâhî mâ hüve’l-vâki‘ bi’l-ibtigā ketb olundu. Fi’l-yevmi’r-râbi‘ min şehri Rebî‘ulevvel li sene sittîn ve sittîn ve elf. Şuhûdü’l-hâl: Hüseyin Beşe b. Mahmud, Ali Beşe b. Mehmed, Mehmed Beşe b. Mehmed, Bâli Beşe b. Süleyman, Mehmed Beşe b. İbrahim, Ali Beşe b. Mustafa, Hüseyin b. Ali, Bayram Sofu b. Mehmed ve gayruhüm