Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 287 Hüküm no: 331 Orijinal metin no: [67b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Memi’nin yanında olan torunu Ahmed’i, babası Ali Beşe’nin haksız yere alıkoyduğu, ninesine teslim etmesinin tenbîh edildiği Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de merhûm Kiremitçi Süleyman mahallesi sâkinlerinden râfi‘at-i hâzihi’l-vesîka Fâtıma bt. Memi nâm hâtun meclis-i şer‘-i şerîfde sadriye kızının zevc-i mutallıkı Ali Beşe b. Mehmed nâm râcil muvâcehesinde üzerine takrîr-i da‘vâ edip mezbûr Ali Beşe’nin kendi firâşından hâsıl olan Ahmed nâm sagīr benim hacr ve terbiyemde olup târih-i kitâbdan üç sene mukaddem medîne-i merkūmede hâkimü’ş-şer‘i’ş-şerîf olan Mustafa Efendi sagīr-i mezbûrun havâic-i zarûriyyesiçün yevmî dört akçe nafaka farz ve takdîr edip sagīr-i mezbûr hâlen beş yaşında olmağla bi hasebi’ş-şer‘ hakk-ı hızâne benim iken mezbûr Ali Beşe sulbî oğlu sagīr-i merkūm Ahmed’i bi gayr-ı vech-i şer‘î alıp bana teslîmden imtinâ‘ eder, suâl olunup teslîme tenbîh olunmak matlûbumdur dedikde gıbbe’s-suâl mezbûr Ali Beşe cevâbında fi’l-hakīka sagīr-i mezbûr beş yaşında olup ve sulbî oğlu olduğunu ve bi gayr-ı vech-i şer‘î müdde‘iye-i merkūmenin baştan aldığını bi tav‘ihî ikrâr ve i‘tirâf etmeğin mûcebiyle sagīr-i mezbûru cedde-i sahîhası merkūme Fâtıma Hâtun’a teslîme kıbel-i şer‘-i kavîmden mersûm Ali Beşe’ye tenbîh olunup mâ hüve’l-vâki‘ bi’l-ibtigā ketb olundu. Fi’l-yevmi’r-râbi‘ min şehri Rebî‘ulevvel li sene sittîn ve sittîn ve elf. Şuhûdü’l-hâl: Mehmed Çelebi b. Mehmed Beyâzî?, Hüseyin Beşe [b.] Mahmud, Veli Beşe b. Süleyman, Mehmed Beşe b. İbrahim, Ali Beşe b. Mehmed, Ali Beşe b. Mehmed, Ali Beşe b. Mustafa, Hüseyin Beşe b. Ali, Bayram Sofu b. Mehmed