Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 289 Hüküm no: 336 Orijinal metin no: [68b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Haslar kazâsına bağlı yerlerdeki Hıristiyan ahâlîye İstanbul Patriği’nin arzı üzerine Atanasyos’un metrepolid olarak tayin edildiği ve görev ve yetkilerini bildiren berât Bundan akdem Haslar kazâsına tâbi‘ kurâhâ-i Terkos ve Büyükdere ve Tarabya ve Küçükköy ve tevâbi‘i keferesi metrepolidliği mahallinde mastûr ve mukayyed olup lâkin zikr olunan metrepolidliği bu âna değin kimesne kabûl etmeyip yeri hâlî kaldığı ecilden işbu dârende-i fermân-ı hümâyûn Atanasyos nâm râhib âyinimiz üzre mahal ve müstehık olmağın hâliyâ İstanbul ve tevâbi‘i keferesi patriği olan Banikyos nâm râhibin arzı mûcebince ve kadîmden olagelen âdet [ve] kānûn üzre mezbûr râhibi kefere tâ’ifesinin üzerlerine metrepolid ta‘yîn edip ve âdet-i piş[k]eşî için bin altmış beş Şevvâlü’l-mükerremin on dokuzuncu gününde hazîne-i âmireme ber vech-i nakid altı yüz seksen akçe teslîm eylemeğin mezbûr râhibe bu berât-ı hümâyûn-ı [meserre]t makrûnu verdim ve buyurdum ki ba‘de’l-yevm merkūm Atanasyos râhib zikr olunan karyelerde ve tevâbi‘i keferesine kadîmden olagelen âdet ve kānûn ve âyinleri üzre metrepolid olup ol yerde olan papazlar ve keşi[ş]ler ve sâir kefere tâ’ifesinin ulusu ve kiçisi râhib-i mezbûru kendilerine metrepolid bilip metrepolidliğe müte‘allik olan husûslarda mezkûra mürâca‘atları olup sözünden tecâvüz eylemeyeler ve mezbûr râhibi metrepolidliğine müte‘allik azl ve nasba müstehak olan papazları ve keşi[ş]leri râhib-i mezbûr âyinleri üzre mûcebince olageldiği üzre azl ve nasb eylediğinde aralarına âhardan kimesne karışmaya ve girmeye ve mezbûr râhibin metrepolidliğine tâbi‘ papazlardan ve keşi[ş]lerden ve kalogaryalardan birisi mürd olsa mu‘tâd-ı kadîm üzre patriğe âid olan metrûkâtların râhib-i mezbûr patrik için ahz ü kabz hilâf-ı âdet ve hilâf-ı kānûn beytülmâl ve kassâm âdemleri tarafından ve âhardan müdâhale olunmaya ve mürd olan papazlar ve keşi[ş]ler ve sâir kefere tâ’ifesi âyinleri üzre kenîseleri fukarâsına ve patriğe her ne vasiyyet ederler ise makbûl olup Rûm şâhidleri ile şemhî? oluna ve ba‘zı papazları ve keşi[ş]leri? mezbûr râhib âyinleri üzre tedîb eylediğinde âhardan kimesne mu‘âraza eylemeye ve kurâ papazları râhib-i mezbûrun ma‘rifeti yoğiken âyinlerine muhâlif nikâh câiz olmayan kefere nikâh eylemeye ve ayırdılmaya ve metrepolidliğine ve taşra yerlerde bir zimmiyye avrat erinden kaçsa veya bir zimmî avratın boşamalı olsa veyâhud avrat almalı olsa ara yerlerine râhib-i mezbûrdan gayrı kimesne karışmaya ve girmeye ve bi’l-cümle kendilerin âyinleri mûcebince kiliselerine müte‘allik bağ ve bahçelerine ve çiftliklerine ve çayırlarına ve tarla ve kûhu? kurbunda olan Ayazma ve Balıklı Ayazma ve sâir ayazmalarına ve manastırlarına ve sâir kenîseye vakıf olan eşyâ ve davarlarına ve bundan evvel mutasarrıf olanlar ne minvâl üzre zabt ve tasarruf edegelmişler ise mezbûr râhib dahi ol minvâl üzre zabt ve tasarruf eyleye, ol bâbda bir ferd mâni‘ ve müzâhim olmayıp dahl ve ta‘arruz kılmaya şöyle bileler alâmet-i şerîfe i‘timâd kılalar. Tahrîren fi’l-yevmi’l-hâmis ve’l-ışrîn min şehri Şevvâli’l-mükerrem li sene hamsin ve sittîn ve elf. Be makām-ı Kostantıniyye[tü’l]-mahrûse