Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 48 Hüküm no: 3 Orijinal metin no: [2a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Maltepe’ye bağlı bazı vakıf köylerden subaşılar tarafından fazla vergi istenmemesi Akzâ kuzâti’l-müslimîn ilh. mevlânâ Hâslar kadısı -zîdet fezâ’iluhu- tevkī‘-i refî‘-i hümâyûn vâsıl olıcak, kazâ-i mezbûr müzâfâtından Maltepesi’ne tâbi‘ ( ) nâm vakf karye sâkinlerinden dârendegân-ı fermân-ı hümâyûn ( ) ve ( ) nâm kimesneler südde-i sa‘âdetime arzuhâl edip bunların tasarruflarında olan mandıralardan defter-i cedîd-i hâkānîde vakfa resm-i hâsıl yazılmağla olugeldiği kānûn ve defter mûcebince edâ eylemeğe râzılar iken vakf-ı mezbûr karyelerinin subaşıları olanlar kanâ‘at etmeyip ziyâde taleb edip rencîde eylemekden hâlî olmadıkların bildirip kānûn ve defter mûcebince amel olunmak bâbında emr-i şerîfim ricâ etmeğin buyurdum ki hükm-i şerîfimle vardıkda bu bâbda tamâm mukayyed olup ve subaşıları mezbûrdan ve südde-i sa‘âdetimden ihrâc olunmuş mühürlü sahîh sûret-i defter-i hâkānî taleb edip göresin zikr olunan mandıralardan defter-i cedîd-i hâkānîde resm yazılmış ise olageldiği üzre kānûn ve defter mûcebince edâ eylediklerinden sonra hilâf-ı şer‘ ve kānûn ve defter ziyâde talebiyle vakf-ı mezbûr subaşılarına bunları rencîde ve remîde ettirmeyip men‘ ve def‘ eyleyesin min ba‘d şer‘-i şerîfe ve kānûn ve deftere ve kadîmden olıgelen ve emr-i hümâyûnuma muhâlif kimesneye iş ettirmeyesin kaziyyede medhali olmayanı dahl ve ta‘arruz ettirmeyip inâd üzre olanları yazıp Âsitâne-i sa‘âdete arz edip bir dahi emr-i şerîfim varmalı eylemeyesin şöyle bilesin alâmet-i şerîfe i‘timâd kılasın. Tahrîren fî evâhiri şehri Zilka‘deti’ş-şerîfe sene isneteyn ve seb‘în ve elf. Be makām-ı Kostantıniyye el-mahrûse. Vasale ve kuyyide ileynâ fî 2 Muharremi’l-harâm li sene selâse ve seb‘în ve elf.