Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 49 Hüküm no: 4 Orijinal metin no: [2a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Eyüb Evkafı subaşılığı görevinin Musa Bey’e verilmesi Vech-i tahrîr-i hurûf oldur ki civâr-ı Kostantıniyye’de âsûde alemdâr-ı hazret-i Resûl-i ekrem -sallallâhu te‘âlâ aleyhi ve sellem- olan Hazret-i Ebâ Eyyûb Ensârî -aleyhi rahmetü’l-Bârî-’nin evkāf-ı şerîfelerinden nefs-i kasaba-i mezbûrenin subaşılığı beher şehr bin sekiz yüz akçeye olmak üzre bundan akdem Seyfi Ağa nâm kimesnenin üzerinde iken, işbu bâ‘isü’l-hayrât fahrü’l-akrân Musa Bey -zîde kadruhû- beher şühûru ben bin akçeye olmak üzre ziyâde ile tâlib ve râgıb olup zikr olunan subaşılık hâlâ dergâh-ı âlî yeniçerileri ağası olan izzetlü ve sa‘âdetlü Sâlih Ağa hazretlerinin iltimâsıyla işbu bin yetmiş üç senesi Muharremü’l-harâmı gurresinden zabt etmek üzre tevliyyetim hasebiyle mezbûr Musa Bey’e deruhde olunup hâ[sı]l-ı maktû‘undan iki aylık kıstı ber vech-i peşîn vakf-ı şerîfe edâ ve teslîm edip kadîmden kasaba-i mezbûrede vâki‘ olan cürm ü cinâyet ve bâd-ı havâ ve yava ve kaçkın ve sâir rüsûmları ola geldiği üzre ahz ü kabz edip ve kasaba-i mezbûre ahâlîsi mezbûru üzerlerine zâbit bilip şer‘-i şerîfe muvâfık sözünden tecâvüz etmeyip âhardan bir ferd dahl eylemeyeler deyû işbu hurûf ketb olunup mezbûrun yedine vaz‘ olundu. Tahrîren fî gurreti Muharremi’l-harâm sene 1073. Vasale ileynâ fî 4 min Muharremi’l-harâm sene 1073. El-hakīr Mustafa el-Mütevellî hâlâ.