Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 49 Hüküm no: 5 Orijinal metin no: [2a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Ağa b. Ahmed’in Keretsi v. İstati’ye olan borcunu ödemesi Bakkāl tâifesinden işbu hâmilü’l-vesîka Keretsi v. İstati nâm zimmî ebnâ-i sebîlinden fahrü’l-akrân Hasan Ağa b. Ahmed nâm kimesne mahzarında üzerine takrîr-i da‘vâ edip mezbûr Hasan târih-i kitâbdan bir sene mukaddem vilâyet-i Rumeli’nden gelip atları ve hizmetkârları ile beher yevm altışar akçe icâre ile medîne-i Eyüb’de Otakçılar sûkunda vâki‘ odamda iki ay sâkin olup zikr olunan iki ayda müctemi‘ üç yüz altmış ve yedimden müşterâ ve makbûz eşyâ-i mütenevvi‘a bahâsından dahi iki yüz akçe ve hâlâ yedimden müşterâ ve makbûz eşyâ-i mütenevvi‘a bahâsından dahi iki yüz yetmiş altı akçe ki mezbûr Hasan Ağa zimmetinde cem‘an yedi yüz otuz altı akçe hakkım olup taleb eylediğimde teslîmden imtinâ‘ eyledi hâlâ suâl olunup alıverilmek murâdımdır deyicek gıbbe’s-suâl mezbûr Hasan Ağa meblağ-ı mezbûrun küllîsini def‘le mukābele edicek mezbûr Hasan Ağa’dan def‘ini mübeyyine beyyine taleb olundukda ityân-ı beyyineden izhâr-ı acz ile istihlâf etmeğin zikr olunan yedi yüz otuz altı akçeyi müdde‘î-i mezbûrdan bi nefsihî ahz ve yâhud âhar yediyle kendisine vâsıl olmadığına müdde‘î-i merkūm Keretsi[’ye] yemîn teklîf olundukda, ol dahi alâ vefki’l-mes’ûl yemîn billâhi’llezî enzele’l-İncîle alâ İsâ -aleyhi’s-selâm- etmeğin mûcebiyle meblağ-ı sâlifü’z-zikr yedi yüz otuz altı akçeyi müdde‘î-i mezbûr Keretsi’ye edâ ve teslîme mezbûr Hasan Ağa’ya tenbîh birle mâ hüve’l-vâki‘ kayd şüd. Fi’l-yevmi’s-sâlis aşer min Muharremi’l-harâm sene 1073. Şuhûdü’l-hâl: Receb Kethüdâ, Sâlih Efendi b. Mehmed, Hüseyin Sarac, Diğer Hüseyin b. Tayyib ve gayruhüm.