Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 50 Hüküm no: 6 Orijinal metin no: [2b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İstanbul gümrüğü emini Mahmud’un iltizamına dahil hamr ve arak vergisine müdahale edilmemesi Akzâ kuzâti’l-müslimîn evlâ vülâtü’l-muvahhidîn ma‘denü’l-fazl ve’l-yakīn hüccetü’l-hakkı ale’l-halkı ecma‘în, vârisü ulûmi’l-enbiyâ’i ve’l-mürselîn, el-muhtas bi mezîdi inâyeti’l-meliki’l-Mu‘în mevlânâ Hâslar kadısı -zîdet fezâ’iluhu- tevkī‘-i refî‘-i hümâyûn vâsıl olıcak ma‘lûm ola ki kıdvetü’l-emâcid ve’l-a‘yân bi’l-fi‘l İstanbul gümrüğü ve tevâbi‘i mukāta‘âtı emîni olan Mahmud -zîde mecduhû- hâlâ Dersa‘âdet’ime arzuhâl edip şart-ı iltizâmıma dâhil hamr ve arak mukāta‘ası mülhakātından kazâ-i mezbûrda ve Edirnekapısı’nda ve Topkapısı’nda ve Taşlık ve Terkos ve Çatalca ve Silivri [ve] Ereğli ve sâir iltizâmıma tâbi‘ olan yerlerde deryâdan sefîneleriyle ve karadan araba ile ve bârgir ve katır ile gelen hamr ve arakın bu âna değin alınageldiği üzre resm-i mîrîsi ve meyhâne ve kazgan-ı arak bitirmeleri şart-ı iltizâmıma dâhil olmağla tarafımdan tahsîli için mühürle ma‘mûlün-bih temessüküm ile vekîlim olanlara ahz ü kabz ettirilip kimesneye dahl ve ta‘arruz ettirilmemek bâbında emr-i şerîf verilmek recâ ederim deyû bildirdiği ecilden Hazîne-i âmiremde mahfûz olan ma‘den mukāta‘ası defterlerine nazar olundukda, mahmiye-i İstanbul ve Galata ve Hâslar kazâlarında vâki‘ hamr ve arak mukāta‘ası mûmâ-ileyh Mahmud -zîde mecduhû-’nun uhdesinde olup Hâslar kazâsında vâki‘ kasabât ve kurânın rüsûm-ı hamr ve arakı eğer deryâdan sefîne ile gelen ve karadan arabalarla gelen eğer yerli bağlarından hâsıl olan şart-ı iltizâmına dâhil olup kasabât ve kurâda vâki‘ meyhânelerin kazganı bitirmesi için dörder bin akçe ve her bir meyhâneden ikişer bin akçe meyhâne bitirmeleri ümenânın şart-ı iltizâmına dâhil olduğu mastûr ve mukayyed bulunmağın imdi berâtı ve şart-ı iltizâmı mûcebince amel oluna ( ) emrim olmuşdur. Buyurdum ki hükm-i şerîfimle vardıkda bu bâbda sâdır olan emrim üzre amel edip dahi mûmâ-ileyhin şart-ı iltizâmına dâhil Hâslar kazâsında ve tevâbi‘inde ve Edirne ve Topkapılarında ve Taşlık ve Terkos ve Silivri ve Ereğli ve sâir iltizâmına dâhil yerlerde eğer deryâdan sefîne ile ve karadan arabalar ile ve bârgir ve katır ile gelen hamr ve arakdan kadîmden bu âna değin alınagelen resm-i mîrîsi vech-i meşrût üzre meyhâne ve arak kazganı bitirmelerini mûmâ-ileyhin vekîline ma‘rifet-i şer‘le ahz ü kabz ettirdip min ba‘d emîn-i mûmâ-ileyhin şart-ı iltizâmına dâhil mersûm hamra evkāf-ı selâtîn zâbitleri ve su yolu nâzırları ve âhardan bir ferdi dahl ve ta‘arruz ettirmeyesin cânib-i mîrîye gadr ve zarar olunmakdan ve olagelmişe muhâlif te‘addî ve tecâvüzden be gāyet ihtirâz eyleyesin şöyle bilesin alâmet-i şerîfe i‘timâd kılasın. Tahrîren fi’l-yevmi’s-sânî ve’l-ışrîn Zilhicceti’ş-şerîfe li sene isneteyn ve (…) [ve seb‘în ve elf]. Vasale ileynâ fî 25 Zilhicceti’ş-şerîfe li sene isneteyn ve seb‘în ve elf. Be makām-ı Kostantıniyye el-mahrûse.