Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 51 Hüküm no: 8 Orijinal metin no: [3a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Istabl-ı âmire için gerekli otun alınarak gönderilmesi Akzâ kuzâti’l-müslimîn evlâ vülâtü’l-muvahhidîn ma‘denü’l-fazl ve’l-yakīn, vârisü ulûmi’l-enbiyâ’i ve’l-mürselîn, hüccetü’l-hakkı ale’l-halkı ecma‘în, el-muhtas bi mezîdi inâyeti’l-meliki’l-Mu‘în mevlânâ Hâslar kadısı -zîdet fezâ’iluhu- tevkī‘-i refî‘-i hümâyûn vâsıl olıcak ma‘lûm ola ki hâlâ Istabl-ı âmiremde olan hâssa davarları için ziyâde otluk tedârik olunması lâzım ve mühim olmağla imdi irsâl olunan nakid akçe ile her bir arabası ikişer yüz vakıyye gelmek üzre her arabasına yüzer akçe verilmek üzre Hâslar kazâsına tâbi‘ Terkos nâhiyesinden üç yüz elli araba ve Küçükçekmece nâhiyesinden iki yüz elli araba ve Büyükçekmece nâhiyesinden iki yüz elli araba ve Çatalca nâhiyesinden iki yüz elli araba ve Silivri nâhiyesinden iki yüz araba ve Midye nâhiyesinden iki yüz araba ki cem‘an bin beş yüz araba otluk olup mu‘accelen iştirâ ve tedârik ve Anbar-ı âmireme irsâl ve teslîm ettirilmek fermânım olmuşdur. Buyurdum ki hükm-i şerîfimle ( ) vardıkda bu bâbda sâdır olan emrim üzre amel edip dahi kat‘â te’hîr ve tevakkuf eylemeyip vech-i meşrûh üzre zikr olunan nâhiyelerden iştirâ ve tedârik fermânım olan ol mikdâr araba ve otluğu irsâl olunan akçe ile mu‘accelen iştirâ ve tedârik ve Anbar-ı âmireme irsâl ve teslîm ettirip ihmâl ve müsâhele eylemeyesin zikr olunan otluk akçe hesâb-ı tekâlîfden değildir sâir[e] kıyâs eylemeyip mu‘âf ve gayr-ı mu‘âf dâhil olmağla her bir karye içinde olan çiftlikler ile ale’s-seviyye tahammüllerine göre tevzî‘ ve defter eyleyip defterini Dersa‘âdet’ime gönderesin ki iştirâsı fermânım olan otluk ol defter mûcebince anbara teslîm olup noksân gelmek ihtimâli olmaya şöyle bilesin alâmet-i şerîfe i‘timâd kılasın. Tahrîren fi’l-yevmi’l-hâmis ve’l-aşer min Zilhicceti’ş-şerîfe li sene isneteyn ve seb‘în ve elf. Vasale ileynâ fî 21 Zilhicceti’ş-şerîfe sene 1072. Bi-makāmı Kostantıniyye el-mahrûse.