Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 57 Hüküm no: 16 Orijinal metin no: [4b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Terkos’a bağlı Sultan Mehmed Han Vakfı köylerine otlak zamanı gelenlerden vergi alınması Akzâ kuzâti’l-müslimîn evlâ vülâtü’l-muvahhidîn ma‘denü’l-fazl ve’l-yakīn, hüccetü’l-hakkı ale’l-halkı ecma‘în, vârisü’l-ulûmi’l-enbiyâ’i ve’l-mürselîn el-muhtas bi mezîdi inâyeti’l-meliki’l-Mu‘în mevlânâ Hâslar kadısı -zîdet fezâ’iluhu- tevkī‘-i refî‘-i hümâyûn vâsıl olıcak ma‘lûm ola ki ceddim merhûm ve mağfûrun-leh Sultan Mehmed Hân -tâbe serâhu- evkāfı mukāta‘alarından kazâ-i mezbûre tâbi‘ Terkos ve sâir tevâbi‘i karyelerinin bi’l-fi‘l zâbiti olan dârende-i fermân-ı vâcibü’l-iz‘ân kıdvetü’l-emâsil ve’l-ekârim Mustafa -zîde kadruhû- südde-i sa‘âdetime arzuhâl edip evkāf-ı mezbûre karyelerinin toprağından hâricden ba‘zı kimesneler otlak zamânında koyunları ile gelip durup otundan ve suyundan intifâ‘ edip öşr ve resm gibi nesne vermeyip kānûn üzre otlak hakkı taleb eyledikde defterde öşr yazılmamışdır vermeziz deyû ta‘allül ve inâd etmeleriyle mahsûl ve kuzu küllî noksân terettüb eylediği bildirip imdi resm-i otlak defterde yazılmak lâzım değildir buyurdum ki hükm-i şerîfimle vardıkda husûs-ı mezbûra tamâm hakk-ı adl üzre mukayyed olup göresin arz olunduğu üzre otlak zamânında hâricden mezbûrlar koyunlar ile gelip mukāta‘a-i mezbûr toprağında durup otundan ve suyundan intifâ‘ edip öşr ve resm gibi nesne vermeyenlerin her üç yüz koyunları bir sürü addedip a‘lâ sürüden bir koyun ve evsat sürüden bir şişek ve ednâ sürüden bir toklu otlak hakkın hükm edip alıverip ta‘allül ve inâd ettirmeyesin mezbûr şer‘-i şerîf ve kānûna ve emr-i hümâyûnuma muhâlif kimesneye iş ettirmeyesin eslemeyip inâd üzre olanları yazıp bildirip husûs-ı mezbûr için tekrâr emr-i şerîfim irsâline muhtâc ettirmeyesin şöyle bilesin alâmet-i şerîfe i‘timâd kılasın. Tahrîren fî evâili şehri Zilhicceti’ş-şerîfe li sene isneteyn ve seb‘în ve elf. Vasale ileynâ fî 4 Muharremi’l-harâm sene 1073. Bi-makāmı Kostantıniyye el-mahrûse.