Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 58 Hüküm no: 17 Orijinal metin no: [4b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Panayot v. Manol’ün mallarını satmak üzre Manol v. Todori’yi vekil tayin etmesi Vilâyet-i Rumeli’nde cezîre-i İmroz’dan olup hâlâ mahmiye-i İstanbul’da mütemekkin olan Panayot v. Manol nâm zimmî meclis-i şer‘-i enver ve mahfil-i dîn-i münevverde takrîr-i kelâm ve ifâde-i merâm edip ile’l-ân zabt ve taht-ı tasarrufumda olup cezîre-i mezbûrede vâki‘ lede’l-ahâlî ve’l-cîrân ma‘lûmü’l-hudûd tarlayı bedel-i misl ile ve babam olup bundan esbak hâlik olan merkūm Manol’den irsen bana isâbet ve intikāl eden mülk-i mevrûs muhallefâtı semen-i misli ile âhara bey‘ ve tefvîz ve bedel ve semenlerini ahz ü kabz ve bana îsâle ve inde’l-hâce lede’l-hükkâmi’l-kirâm tarla-yı mezkûru ve babam hâlik-i merkūmdan bana irsen isâbet eden muhallefâtı vâzı‘ü’l-yed olanlar ile mürâfa‘a ve muhâsamaya ve kabz ve îsâle mü[te]vakkıf olduğu umûrun küllîsine işbu hâmilü’l-vesîka Boyacıoğlu demekle ma‘rûf Manol v. Todori nâm zimmîyi tarafımdan vekîl ve nâib-i menâb nasb ve ta‘yîn eyledim dedikde ol dahi vekâlet-i mezbûreyi kabûl ve hıdemât-ı lâzımesini edâya müte‘ahhid olmağın mâ cerâ kayd şüd. Fi’l-yevmi’s-sâmin aşer min Muharremi’l-harâm sene 1073. Şuhûdü’l-hâl: Receb Ağa b. Maden, Hasan Muhzır, Panayot v. İstirati, Angili v. Mavridi ve gayruhüm.