Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 58 Hüküm no: 18 Orijinal metin no: [5a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Derbend hizmeti karşılığı avârızdan muaf tutulan Devletli Kavak köyü ahalisine müdahale edilmemesi Akzâ kuzâti’l-müslimîn evlâ vülâtü’l-muvahhidîn ma‘denü’l-fazli ve’l-yakīn, vârisü ulûmi’l-enbiyâ’i ve’l-mürselîn, hüccetü’l-hakkı ale’l-halkı ecma‘în, el-muhtas bi mezîdi inâyeti’l-meliki’l-Mu‘în mevlânâ Hâslar kadısı -zîdet fezâ’iluhu- tevkī‘-i refî‘-i hümâyûn vâsıl olıcak ma‘lûm ola ki kazâ-i mezbûr müzâfâtından Silivri kazâsına tâbi‘ Devletli Kavak nâm karye re‘âyâsı hâlâ Dersa‘âdet’ime âdem ve arzuhâl gönderip biz kadîmî defter-i cedîd-i hâkānîde mukayyed avârız-ı dîvâniyye ve sâir tekâlîf-i örfiyyeden mu‘âfiyetle derbendçi olup hizmet-i lâzımemizi edâ edip kusûrumuz yoğiken ve sefer-i hümâyûn için fermân olunan sürsat zahîresini dahi edâ eylemeği râzılar iken hâlâ kasaba-i mezbûr ahâlîsi sâir tekâlîfi dahi bizimle veriniz deyû rencîde ederler men‘i bâbında emr-i şerîf verilmek recâ ederiz deyû bildirdikleri ecilden Hazîne-i âmiremde mahfûz olan mevkūfât defterlerine nazar olundukda derbend hizmeti mukābelesinde avârızdan mu‘âf olanlar fermân-ı sürsat zahîresine râzı olup ancak hâne ile olan teklîfi dâhil olmamağın imdi fermânım olan sürsat zahîresini verip, hâne ile olan teklîf ile rencîde ettirilmeye deyû fermânım olmuşdur. Buyurdum ki hükm-i şerîfim vardıkda bu bâbda sâdır olan emrim üzre amel edip dahi mezbûrlar sefer-i hümâyûnum için emr-i şerîfimle ihrâcı fermân olan sürsat zahîresini verip, derbend hizmeti mukābelesinde hâne ile olan teklîf ile hilâf-ı emr ve defter rencîde ve remîde ettirmeyesin, şöyle bilesin alâmet-i şerîfe i‘timâd kılasın. Tahrîren fi’l-yevmi’s-sânî [min] şehri Zilka‘de sene isneteyn ve seb‘în ve elf. Vasale ileynâ fî 3 Zilka‘de sene 1072. Bi-makāmı Kostantıniyye el-mahrûse.